فۋتبول: قازاقستان قۇراماسى اندوررامەن تەڭ ءتۇستى
ءبىزدىڭ قۇراما ۇلتتار ليگاسى شىمىلدىعىن اشۋىمەن تاريحتا جازىلىپ قالدى. 6- قىركۇيەكتە ولار ءوز الاڭىندا گرۋزيانى قابىلدادى. دەگەنمەن العاشقى قازاقستان قۇراماسى اتالمىش قارسىلاسىنا 0:2 ەسەبىمەن جول بەردى. سوندىقتان ءبىزدىڭ جىگىتتەر بۇگىنگى ويىندا جەڭىسكە جەتۋگە بار كۇشىن سالاتىنى بەلگىلى ەدى. ولاي بولاتىن ءجونى بار.
بۇل كەزدەسۋدە ۇپاي جوعالتساق ءبىزدىڭ قۇراماعا توپتان شىعۋ مۇمكىندىگى قيىنداي تۇسەدى. ءبىزدىڭ باستى قارسىلاسىمىز - گرۋزيا ەكىنشى ويىنىندا جەڭىسكە جەتىپ، ۇپاي قورجىنىن مولايتا ءتۇستى . ءبىرىنشى تۋردا لاتۆيا مەن اندوررا 0:0 ەسەبىمەن تەڭ ءتۇستى. ەندەشە، اندوررادان ايلا اسىرا الماساق بىزدەرگە جولدامانىڭ اۋىلى الىستاي تۇسەرى انىق.
قازاقستان قۇراماسىنىڭ باس باپكەرى ستانيمير ستويلوۆ وتكەن ويىنداعى قۇرامنان ءبىرشاما وزگەرىس ەنگىزدى. بۇل جولى نەگىزگى قۇرامدا ەركەبۇلان تۇڭعىشبايەۆ پەن يۋري لوگۆينەنكونى العاشقى مينۋتتان جاسىل الاڭعا شىعاردى. گرۋزيامەن كەزدەسۋدە ولاردىڭ ورنىندا سەرگەي مالىي مەن گەورگي جۋكوۆ بولعان ەدى.
ءبىزدىڭ جىگىتتەر بىردەن-اق شابۋىل شەبىنە كوڭىل ءبولدى. الاڭ يەلەرى قاقپاسى ماڭىندا بىرنەشە قاۋىپتى ساتتەردى ۇيىمداستىردى. دەسە دە اندوررالىق فۋتبولشىلار دا قاراپ قالعان جوق. كەيبىر ساتتەردە قارسى شابۋىلدارعا شىعىپ جاتتى. ويىننىڭ 25-مينۋتىندا ءبىزدىڭ قۇراماعا گول سوعاتىن مۇمكىندىك بولعان ەدى. سول قاناتتان بەرىلگەن پاستى قاقپا الدىندا تۇرعان شابۋىلشىلار ءوز پايداسىنا جاراتا العان جوق. ال 31-مينۋتتا وزىنە اۋەلەپ دوپتى باسپەن قاقپا الدىنداعى ارىپتەستەرىنە باعىتتاعان رومان مۋرتازايەۆتىڭ ارەكەتى دە ءساتسىز بولدى. ءبىرىنشى كەزەڭدە قوس قۇراما دا ەسەپ اشا العان جوق.
قازاقستان قۇراماسى اندوررادان 3 ۇپاي الۋدىڭ بارلىق مۇمكىندىگىن قاراستىرىپ جاتتى. ەكىنشى كەزەڭدە دە ويىن تىزگىنى ءبىزدىڭ قولىمىزدا بولعانىمەن ونى گولعا اينالدىرۋ قيىن ءتيىپ جاتتى. كەيبىر ساتتەردە دالدىك تە جەتىسپەي جاتتى. وسىنداي ءقاۋىپتى ءسات 60-مينۋتتا بولدى. وڭ قاناتتان اۋەلەتە بەرگەن دوپقا سەرىكجان مۋجيكوۆ ءسال عانا جەتپەي قالدى. 64-مينۋتتا باۋىرجان يسلامحان دا اندوررالىق قاقپاشىنىڭ شەبەرلىگىن سىناپ كوردى. ونىڭ الىستان شىرەنە تەپكەن دوبىن قاقپاشى حوسە گومەس ارەڭ دەگەندە سىرتقا شىعارىپ ۇلگەردى.
ۇلتتار ليگاسىنداعى ءبىزدىڭ قۇرامانىڭ العاشقى گولىن قورعاۋشى يۋريي لوگۆيەنكو ءوزىنىڭ ەنشىسىنە جازدى. ول سول قاناتتان اۋەلەتە بەرگەن دوپقا بارىنەن بيىك سەكىرىپ، قاقپا تورىن بۇلك ەتكىزدى. بۇل ويىننىڭ 68-مينۋتى بولاتىن. ال 75-مينۋتتا سەرىكجان مۋجيكوۆ ەكىنشى سارى قااز الىپ الاڭنان ۋىلىپ، ءبىزدىڭ قۇراما فۋتبولشىمەن قالدى. ال 84-مينۋتتا اندوررا تارازى باسىن تەڭەستىرىپ كەتتى. ونى جوردي الاەز سوقتى. ويىن 1:1 ەسەبىمەن تەڭ اياقتالدى.
ءۇشىنشى تۋر ويىندارى ەندى 13- قازاندا وتەدى. بۇل كۇنى قازاقستان لاتۆياعا قوناققا بارسا، اندوررا سىرت الاڭدا گرۋزيامەن كەزدەسەدى.
