لوندون پاركتەرى جەكەشەلەندىرىلىپ بارا ما؟
مامانداردىڭ ايتۋىنشا، لوندون تۇرعىندارىنىڭ كوپتەگەن پاركتەرگە قولجەتىمدىلىگىن ۇجىمدىق ءىس- شارالار مەن مۋزىكالىق فەستيۆالدار شەكتەپ جاتىر.
«بۇل قوعامدىق ورىنداردى «جەكەشەلەندىرۋدىڭ» كەمشىلىكتەرى دە كوپ» ، - دەيدى ولار.
كورولدىك گەوگرافيا قاۋىمداستىعىنىڭ جىل سايىنعى كونفەرەنتسياسىندا ۇسىنىلعان باياندامادا لوندون پاركتەرىنىڭ جەكە كومپانيالارعا ءجيى جالعا بەرىلەتىنى، سول ارقىلى بيلىك قارجىلاندىرۋ كوزىن ارتتىرۋعا تىرىسىپ جاتقانى ايتىلعان.
ۆەستمينستەر ۋنيۆەرسيتەتىنىڭ گەوگرافى، دوكتور ەندريۋ ءسميتتىڭ ايتۋىنشا، زەرتتەۋ بارىسىندا ەسكەرىلگەن Finsbury Park, Gunnersbury Park جانە Brockwell Park ساياباقتارى كوممەرتسيالىق اكتيۆكە اينالىپ بارا جاتقانى بايقالعان.
«قاتاڭ ەكونوميكالىق تالاپتار تۋىنداعان زاماندا ساياباقتاردا ءىرى جانە شاعىن فەستيۆالدەر ۇيىمداستىرۋ دا تابىس كوزىنە اينالعان. ءبىر جاعىنان قاراساق، بيلىك تابىس كوزىن ارتتىرىپ جاتىر. ءبىراق جەرگىلىكتى بيلىك قوعامدىق ورىنداردى بىلاي قولدانۋدان تارتىنشاقتاعاندارى ءجون. بۇل پاركتەرگە جاقىن تۇراتىن تۇرعىندار جىلىنا بىرنەشە اپتا بويى ساياباقتارعا كىرە الماعانىمەن قويماي، شۋ سەكىلدى ىڭعايسىزدىقتارعا ۇشىرايدى» ، - دەيدى ول.
بلەكحيتتى ءبولىپ تۇرعان گرينۆيچ جانە ليۋيشام كەڭەستەرى ساياباقتا جىلىنا 90 كۇن ءتۇرلى ءىس- شارالار وتكىزۋگە رۇقسات بەرەدى. بۇعان لوندون مارافونىن قوسساڭىز، قوعامدىق ورىن 187 كۇن، ياعني، جارتى جىلدان استام ۋاقىت قولجەتىمدى بولمايدى.
ءسميتتىڭ ايتۋىنشا، 1991 -جىلى باتتەرسي- پاركتە 99 ءىس- شارا وتسە، 2016 -جىلى بۇل كورسەتكىش 600 گە جەتتى. ال Finsbury Park توبىنىڭ جەتەكشىسى سايمون حانت 2014 -جىلى ساياباقتا ءۇش كۇندىك فەستيۆال وتكىزىلگەننەن كەيىن پاركتىڭ «تاۋلىك بويى ىستەيتىن كوممەرتسيالىق ورىنعا» اينالعانىن ايتتى.
«جاز ايلارىندا كوپشىلىك ءۇشىن ساياباق جابىق. بۇل تۇرعىنداردىڭ دا شىدامىن الدى» ، - دەيدى حانت.
ونىڭ ايتۋىنشا، 2018 -جىلدىڭ العاشقى توعىز ايىندا ول 113 كۇن بويى ەفستيۆالدار جۇمىسىمەن اينالىسقان. ال 2015 -جىلى مۇنداي ۋاقىت ارالىعىندا ءىس- شارالار تەك 29 كۇن وتكىزىلگەن. ال پاركتىڭ باسپا ءسوز حاتشىسىنىڭ ايتۋىنشا، مۇنداي فەستيۆالدار وتە قاجەتتى قارجىنى تابۋعا كومەكتەسكەن جانە وعان جەرگىلىكتى تۇرعىندار دا قاتىسقان.
دەگەنمەن، پاركتەردەگى مۇنداي كوممەرتسيالىق قىزمەت توپىراقتى دەگراداتسيالاپ، ساياباقتىڭ جايىن السىرەتەدى. قوعامدىق ورىنداردى ءىس- شارالار وتكىزۋ ءۇشىن قولدانۋ سونىمەن قاتار قوعامنىڭ وعان قولجەتىمدىلىگىن دە تومەندەتەدى. ءسميتتىڭ ايتۋىنشا، بۇل جەردە قارجىلىق تابىس قوعامنىڭ قاجەتتىلىكتەرىنەن دە باسىمدىققا يە بولىپ تۇر.
«قوعامدىق ورىندار وسىلايشا جەكەشەلەندىرىلىپ بارا جاتقانداي كورىنەدى. فەستيۆالدەر قوعامدىق شارالار بولىپ كورىنگەنىمەن، ءبارىبىر قارجىلىق جاعداي باسىمدىققا يە بولىپ تۇر. پاركتەردى كوممەرتسيالىق اكتيۆ رەتىندە قولدانۋعا جەرگىلىكتى بيلىكتەر قاتتى ۇيرەنبەۋلەرى كەرەك. ساياباقتار قارجىلىق جاعدايدان گورى ماڭىزدىراق» ، - دەيدى سايمون.
اعىلشىن تىلىنەن اۋدارعان التىناي قۋانىشبەك قىزى
Baq.kz
