جەڭىس قاسىمبەك جاڭادان سالىنعان جولداردىڭ ساپاسى قالاي تەكسەرىلەتىنىن ءتۇسىندىردى

استانا. قازاقپارات - ق ر ينۆەستيتسيالار جانە دامۋ ءمينيسترى جەڭىس قاسىمبەك رەسپۋبليكالىق جولداردىڭ ساپاسىنا قاتىستى سىنعا جاۋاپ بەردى، دەپ حابارلايدى قازاقپارات.

 «بۇگىندە رەسپۋبليكالىق جولدار جەلىسىنىڭ ساپاسىن قاداعالاۋ تەتىگى كوپ ساتىلى دەڭگەيدە جۇرگىزىلەدى. بۇل تۇرعىدا اۆتورلىق باقىلاۋ بار، سودان كەيىن تەحنيكالىق باقىلاۋ جۇمىستارىنا ماماندار جالدانادى. ەگەر دە جوبانى حالىقارالىق بانك قارجىلاندىرسا، وندا كومپانيالاردى وزدەرى جالدايدى. نەگىزىنەن، حالىقارالىق تاجىريبەسى مەن مارتەبەسى بار ءىرى كومپانيالار جالدانادى. ولار تاۋەلسىز. مىسالى، جولداردا انىقتالعان كەز كەلگەن اقاۋلار ولاردىڭ بەدەلىنە ىقپال ەتەدى. سوندىقتان بۇل كومپانيالار وسى جۇمىستاردى قاتاڭ باقىلاۋدا ىسكە اسىرادى»، - دەدى ج. قاسىمبەك.

سونىمەن قاتار مينيستر حالىقارالىق جانە جەرگىلىكتى كەلىسىمشارتتار بويىنشا 3-4 جىلدىق كەپىلدىكتى مەرزىم بار ەكەنىن اتاپ ءوتتى. وسى مەرزىمگە ەسەپ- شوتتاردا بانكتىك كەپىلدىك ۇستالىنادى.

«ەگەر دە اتالعان كەپىلدىكتى مەرزىمدە جولدا اقاۋلار انىقتالسا، وندا كومپانيا ءوزىنىڭ جەكە قارجىسىنا تولىقتاي جوندەۋ جۇمىستارىن اتقارۋى قاجەت. بۇل تۇرعىدا تاپسىرىس بەرۋشىگە نىساندى جاڭادان تاپسىرادى. سونىمەن بىرگە، قوسىمشا كەپىلدىكتى مەرزىمدەر ۇزارتىلادى»، - دەپ ءتۇسىندىردى مينيستر.

ونىڭ سوزىنە قاراعاندا، بۇل قاداعالاۋ شارالارى كومپانيالاردى باستاپقىدان ساپالى جۇمىستاردى جۇرگىزۋگە ىنتالاندىرادى.

 «بۇل باعىتتا سوت تالقىلاۋلارى مەن ساپاسىز قۇرىلىس نىساندارى سانى ايتارلىقتاي ازايعانىن ايتا الامىن»، - دەدى ج. قاسىمبەك.

 ءوز كەزەگىندە ءماجىلىس دەپۋتاتى نۇرتاي سابيليانوۆتىڭ اتاپ وتۋىنشە، سالانىڭ باستى پروبلەماسى - ول جول جابىندارىنىڭ كوتەرۋ قابىلەتىنىڭ جىلدام توزۋى.

 «ماسەلەن، كۇردەلى ءارى ورتاشا جوندەۋدى تالاپ ەتەتىن جالپى پايدالانىمداعى جولداردىڭ ۇزاقتىعى 30 مىڭنان استام شاقىرىمدى قۇرايدى. اۆتوجولداردىڭ قاۋىپسىزدىگىن ارتتىرۋ جانە جاي- كۇيىن جاقسارتۋ ءۇشىن ۋاقتىلى جوندەۋ، سونداي- اق تيىسىنشە كۇتىپ- ۇستاۋ جۇمىستارىن جۇرگىزۋ قاجەت. بۇدان باسقا، بۇگىنگى تاڭدا اۆتوجولدار جەلىسىن كۇتىپ- ۇستاۋعا ارنالعان تەحنيكانىڭ بولۋى نورماتيۆتىك قاجەتتىلىكتەن 3 ەسەگە از. ونىڭ ۇستىنە، ولاردىڭ 40 پايىزى فيزيكالىق تۇرعىدان توزعان»، - دەدى دەپۋتات.

بۇدان بۇرىن حابارلانعانداي، نۇرتاي سابيليانوۆ جول ساپاسىنا تەرىس اسەر ەتكەن نەگىزگى سەبەپتەردى اتادى.

  اۆتور: رۋسلان عابباسوۆ