دەپۋتاتتار مينيسترلىكتەن جول قۇرىلىسىنا كەدەرگى كەلتىرمەۋدى تالاپ ەتتى

استانا. قازاقپارات - پارلامەنت ءماجىلىسى ءتوراعاسىنىڭ ورىنباسارى ۆلاديمير بوجكو اۋىل شارۋاشىلىعى مينيسترلىگىنەن ورمان قورى ۋچاسكەلەرىن جول قۇرىلىسىنا بەرۋ شارالارىن جىلدامداتۋدى تالاپ ەتتى، دەپ حابارلايدى قازاقپارات.

«جول قۇرىلىسى ءۇشىن پايدالانىلاتىن جەرلەرگە ورمان قورىنىڭ 11 ۋچاسكەسىن اۋىستىرۋ بويىنشا كەلىسۋ شارالارىنىڭ نەگىزسىز ۇزاققا سوزىلۋى ماسەلەسىنە اۋىل شارۋاشىلىعى مينيسترلىگىنىڭ نازارىن اۋدارعان ءجون. بۇل رەتتە 118 گەكتار جەر اقمولا، قاراعاندى، پاۆلودار، شىعىس قازاقستان وبلىستارىندا تىركەلگەن. بۇل جوبالار 2015 -جىلدان بەرى ق ر اۋىل شارۋاشىلىعى مينيسترلىگىنىڭ قاراۋىندا جاتىر. جول سالاتىنداردى دالىزدەردە ەرسىلى- قارسىلى جۇرگىزىپ قويعاندى دوعارۋ كەرەك. ولاردىڭ ونسىز دا پروبلەمالارى از ەمەس»، - دەدى ۆلاديمير بوجكو.

بۇدان بولەك دەپۋتاتتار سالىق كودەكسىنىڭ 748 بابى اياسىندا 2018 - جىلدىڭ قاڭتارىنان باستاپ جول سالاتىندار ءۇشىن ينەرتتى ماتەريالدار قۇنى 10 ەسەگە ارتقانىن ءسوز ەتتى.

«نەگە وسىنداي ۇيلەسىمسىزدىك ورىن الىپ وتىر؟ اتاپ ايتقاندا، جەر قويناۋىن پايدالانۋ مەن جول سالاتىندار ءبىر مينيسترلىكتىڭ قۇزىرىندا. سوندىقتان بۇل باعىتتاعى جۇمىستاردى ۇيلەستىرىپ، جول قۇرىلىسىن تەجەيتىن مۇنداي فاكتىلەردىڭ دەر كەزىندە الدىن الۋ قاجەت»، - دەپ ءتۇيدى ۆ. بوجكو.

اۆتور: رۋسلان عابباسوۆ