11:13, 10 - قىركۇيەك 2018 | GMT +5
قازاقستاندىق فيلم اناپاداعى كينوفەستيۆالدە جۇلدەگە يە بولدى
الماتى. قازاقپارات - قازاقستاننىڭ ەڭبەك سىڭىرگەن ءارتىسى، مارقۇم ۆلاديمير تولوكوننيكوۆكە «كينوشوك» رەسەيلىك كينوفەستيۆالى نوميناتسيالارىنىڭ ءبىرىنىڭ سىيلىعى تابىستالدى، دەپ حابارلايدى قازاقپارات ءتىلشىسى.
فەستيۆالدىڭ رەسمي سايتىندا اتاپ وتىلگەندەي، «تولىق مەتراجدى فيلم» اتالىمىندا ۇزدىك ەر ادام رولىنە «دەد» فيلمىندەگى ەڭبەگى ءۇشىن ۆلاديمير تولوكوننيكوۆ لايىق دەپ تانىلدى.
فيلمدى 90 جىلدارداعى «توعىسقان تاعدىرلار» سەريالى ارقىلى تانىلعان رەجيسسەر الەكسەي شەمەس تۇسىرگەن. ا. شەمەس فەستيۆالدىڭ «ۇزدىك رەجيسسۋرا» اتالىمىندا جەڭىسكە جەتتى.
قىسقا مەتراجدى فيلمدەر كونكۋرسىنىڭ «قازىرگى جاس وسپىرىمدەردىڭ وزەكتى پروبلەمالارىن ەكراندا كورسەتۋ» باعىتىنداعى ارنايى سىيلىعى قازاقستاندىق رەجيسسەر ءالىمجان قۇدابيەۆقا «ماراتتىڭ ۆيدەوسى» اتتى فيلمى ءۇشىن بەرىلدى.
«كينوشوك» - ت م د جانە بالتىق بويى ەلدەرىنىڭ اشىق فەستيۆالى. ول 1992-جىلدان بەرى رەسەيدىڭ اناپا قالاسىندا وتكىزىلىپ كەلەدى.
