قازاقستاندىق «تۇيمەقىز» رەكورد ورناتتى

قوستاناي. قازاقپارات - پاراليمپيادالىق پاۋەرليفتينگتەن حالىقارالىق دارەجەدەگى سپورت شەبەرى، قازاقستاندىق «تۇيمەقىز» ەسىمىمەن تانىمال تۇرسىناي قابىل ازيا-مۇحيت ايماعى چەمپيوناتىندا ەكى «التىندى» ەنشىلەپ قايتتى، دەپ حابارلايدى قازاقپارات.

بيىلعى ازيا-مۇحيت ايماعى چەمپيوناتى جاپونيا مەملەكەتىندە ءوتتى. بايراقتى دودادان قازاقستاندىقتار قۇر قول قايتقان جوق. «تۇيمەقىز» ەسىمىمەن تانىمال قوستانايلىق تۇرسىناي قابىل چەمپيوناتتىڭ قوس «التىنىن» قورجىنعا سالدى.

«ازيا-مۇحيت ايماعى چەمپيوناتىندا پاۋەرليفتينگتەن العاشقى 2 التىن مەدال بار. جۇلدەلەردى ەل قورجىنىنا 2004-جىلى تۋعان قوستاناي وبلىسىنىڭ سپورتشىسى تۇرسىناي قابىل سالدى. 41 كەلى سالماق دارەجەسىندە ول ازيانىڭ جاڭا رەكوردىن ورناتتى»، - دەپ حابارلادى ۇلتتىق پاراوليمپيادالىق كوميتەت ينستاگرامم جەلىسىندە.

سپورتشىنىڭ ءوزى دە جانكۇيەرلەرگە الەۋمەتتىك جەلىلەر ارقىلى العىسىن ءبىلدىردى.

ەسكە سالساق، تۇرسىناي قابىل بيىلعى اقپان ايىندا دۋبايدا وتكەن الەم كۋبوگى ويىندارىنان جۇلدەلى ورالعان بولاتىن.

سونداي-اق، امبەباپ سپورتشى رەسپۋبليكالىق «Miss Virtual Kazakhstan-2018» سۇلۋلىق كونكۋرسىندا ەكىنشى ورىنعا يە بولدى.