شەبەر ءمۇيىز بەن سۇيەكتەردەن تاڭعاجايىپ مۇسىندەر جاسايدى
شەبەر كۇندە ءبىز قوقىسقا تاستايتىن زاتتاردىڭ ءوزى پايداعا اساتىنىن ايتادى.
«ءبىز ۇلان- عايىر دالادا ءومىر سۇرەمىز. تابيعات- انانىڭ قۇدىرەتىنە قايران قالماسقا لاج جوق. سۋ استى الەمىندە نەبىر تاڭعاجايىپ جانۋارلار مەكەندەيدى. سونىڭ ءبارىن كورسەتكىم كەلەدى. قازاقتار ەجەلدەن تابيعات ماتەريالدارىن شەبەر قولدانعان. ماسەلەن، تۇيمەنى مۇيىزدەردەن جاساعان، تەرىنى پايدالانعان. قوزى نەمەسە وگىزدىڭ تەرىسىنەن قامشى ورگەن. بۇگىنگى ومىرىمىزدە وسىنىڭ ءبارىن قوقىسقا لاقتىرامىز، ەگەر ولاردى ءتيىمدى پايدالانسا، ءتاۋىر بۇيىمدار جاساۋعا بولادى»، - دەيدى م. انداعۇلوۆ.
شەبەر تەك ءمۇيىز بەن سۇيەكتەردى عانا قولدانۋمەن شەكتەلمەيدى. ءبىراق تەڭىز جانۋارلارىنىڭ كوللەكسياسىندا نەگىزىنەن وسى ماتەريالدار پايدالانىلعان. جايىندى قوشقاردىڭ مۇيىزىنەن جاساعان. ونىڭ ۇستىنە سىزىلعان سۋرەتتىڭ تابيعيلىعى سونشالىق، ۇستاعان قولعا بالىقتىڭ قابىرشاعى بىلىنەتىندەي.
«مەن قوناققا بارعان ءۇيدىڭ يەلەرى يتكە ەشتەڭە قالمايتىن بولدى، سۇيەكتىڭ ءبارىن مارات الىپ كەتەدى دەپ كۇلىسەدى. كىم قايدا بارسا دا، ماعان جۇمىس ىستەرلىك ماتەريال الا كەلەدى»، - دەيدى شەبەر.
ءبىر ءمۇسىندى جاساۋعا بىرنەشە اي كەتەدى. كەيدە قاجەتتى ماتەريال تابىلماي قويادى. م. انداعۇلوۆ قازىر كەز كەلگەن ماتەريالدى ساتىپ الۋعا بولاتىنىن ايتادى. ءبىراق ونىڭ ءبارى دە سايكەس كەلە بەرمەيدى. ۇندەستىك بولۋى قاجەت.
م. انداعۇلوۆ پەداگوگتىك قىزمەتكە 40 جىل عۇمىرىن بەردى. قازىر بالالاردى شەبەرلىككە باۋلىپ وتىر. وقۋشىلارى جاتتىعۋعا قىزىعا قاتىسىپ، كەيدە بۇيىمداردىڭ نۇسقالارىن وزدەرى ۇسىنادى.
«قولعا تۇسكەننىڭ ءبارى بۇيىم جاساۋعا جۇمسالادى. بالالاردىڭ وزدەرى دە ساباققا بىرەر ماتەريال كوتەرىپ كەلەدى. بارلىعىن دا ءوز قولىمىزبەن، ستانوكتاردا جاسايمىز. شاكىرتتەرىمنىڭ كەيبىرى ديزاينەر بولدى»، - دەيدى ۇستاز.
شەبەردىڭ ايتۋىنشا، كەيدە كورمەگە قويىلعان بۇيىمدارىن بالالار ساعاتتاپ تاماشالاپ تۇرادى ەكەن.
«تابيعات بىزگە ءبارىن بەرگەن. تەك، بۇزباي، قولدان كەلگەنىن جاساۋ كەرەك»، - دەيدى م. انداعۇلوۆ.
