ۇلتتار ليگاسى: قازاقستانمەن ءبىر توپتاعى گرۋزيا تاعى دا جەڭدى
ءبىرىنشى تۋردا D ليگاسىنىڭ 1-توبىندا ونەر كورسەتەتىن گرۋزيا استانادا قازاقستان قۇراماسىن 2:0 ەسەبىمەن تىزە بۇكتىرسە، لاتۆيا ءوز الاڭىندا اندوررامەن تەڭ تارقاسقان ەدى. سوندىقتان بۇل كەزدەسۋ قوس كوماندا ءۇشىن اسا ماڭىزدى ەدى.
تارتىستى وربىگەن ماتچ بارىسىندا الاڭ يەلەرىنىڭ باسىمدىلىعى بايقالدى. لاتۆيالىقتار ارا- تۇرا قارىمتا شابۋىلعا شىعىپ وتىردى.
كەزدەسۋ سوڭىنا تامان قوناقتاردىڭ ايىپ الاڭىندا گرۋزيالىق ويىنشىنى اياعىنان شالىپ قۇلاتتى دەگەن سەبەپپەن گرەكيالىق قازى اناستاسيوس پاپاپەترۋ 11 مەترلىك پەنالتي بەلگىلەدى. بۇل نۇكتەدەن 77-مينۋتتا تورنيكە وكرياشۆيلي ءمۇلت كەتكەن جوق.
بۇدان كەيىن لاتۆيالىقتار قانشاما العا ۇمتىلىپ باققانىمەن، ەسەپ وزگەرگەن جوق. اسىرەسە، قوسىمشا ءتورت مينۋتتا ءۇش مارتە بۇرىشتامادان دوپ بەرىلگەنىمەن، ودان ەش ناتيجە بولمادى. ايىپ سوققىسى دا دىتتەگەن جەرىنە جەتكەن جوق.
لاتۆيا قۇراماسى ساپىندا ورالدىڭ «اقجايىعىندا» وينايتىن ارتۋر كاراشاۋسكس الاڭعا شىقتى. ول شابۋىلدى ۇيىمداستىرىپ قانا قويماي، بۇرىشتاما جانە ايىپ دوپتارىن بەرىپ وتىردى. ارتۋر 68-مينۋتتا قارسىلاسىن جەيدەسىنەن تارتىپ توقتاتىپ، ەسكەرتۋ دە الدى.
وسىلايشا قارسىلاسىن 1:0 ەسەبىمەن ۇتقان سلوۆاكيالىق مامان ۆلاديمير ۆايستىڭ شاكىرتتەرى ءوز توبىندا التى ۇپايمەن جەكەدارا كوش باستادى.
ايتا كەتەيىك، بۇل توپتا بولگاريالىق مامان ستانيمير ستويلوۆ جاتتىقتىراتىن قازاقستاندىقتار ەكىنشى ويىنىن 10 - قىركۇيەك كۇنى سىرت الاڭدا اندوررامەن وتكىزەدى. اندوررالىقتار وڭاي شاعىلاتىن جاڭعاق ەمەستىگىن ريگادا بولعان ماتچتا كورسەتتى. ءوز الاڭىندا گرۋزياعا ەسە جىبەرگەن قازاقستان قۇراماسىنا ۇپاي اۋاداي قاجەت. سوندىقتان بۇل كەزدەسۋدىڭ اسا تارتىستى وتەرى انىق.
اۆتور: ەلجان ەرالى
