قانات يسلام رينگكە قايتا ورالادى
بوكسشى ينستاگرامداعى پاراقشاسىندا سپورت جولىندا ارقالاعان جاۋاپكەرشىلىگى مەن ومىرلىك ۇستانىمى تۋرالى ايتتى. سونداي-اق ول جانكۇيەرلەرىنە العىس ءبىلدىرىپ، شارشى الاڭعا قايتا شىعۋعا دايىن ەكەندىگىن اتاپ ءوتتى.
«بارلىقتارىڭىز بىلەتىندەي سپورت جولى - ايتارلىقتاي كۇردەلى جول. ويتكەنى، وندا ءبىر عانا ادامنىڭ، جەكە سپورتشىنىڭ ماقساتى جاتقان جوق. وندا - كۇللى ۇلىستىڭ، تاۋەلسىز ەلدىڭ، قايمانا قازاقتىڭ، قارا ورمانداي جۇرتتىڭ ارمان-ماقساتى، سەنىمى مەن ءۇمىتى ۇيالاعان. وندا ۇلتتىڭ نامىسى، جەلبىرەگەن تۋدىڭ اسقاقتاعى، ۇلبىرەگەن ۇلكەن-كىشىنىڭ تالاپ-تىلەگى جاتىر. ءوزىم دەگەن سپورتشى سايىس مايدانىنا وسىلاردىڭ بارلىعىن ارقالاپ شىعادى. ارقالاپ شىققان ەكەن، قانداي قامال بولسا دا الۋى كەرەك. بۇل مەنىڭ سپورت جولىمدا، ءومىر ساپارىمدا ۇستانعان بۇلجىمايتىن قاعيدام»، - دەپ جازدى ول.
سونداي-اق قانات يسلام نە ءۇشىن ۇزاق ۋاقىت رينگكە شىقپاعانىن ءتۇسىندىردى.
«ءبىراز ۋاقىت شارشى الاڭنان شەتتەلىپ قالعان جايىم بار. وعان سەبەپ - سايىس پەن جاتتىعۋ كەزىندە جازاتايىم العان جاراقات. فيزيكالىق تۇرعىدا ساقاداي-ساي بولۋ سپورتشىنى جەڭىس جولىنا جەتەلەيتىن مۇمكىندىكتەردىڭ نەگىزگىسى. وسىعان وراي از ۋاقىت ەمدەلىپ، الداعى ايقاس الاڭىنا الاڭسىز شىعۋ ءۇشىن كىدىرىس جاساعانىم بار. بۇيىرتسا، ول قيىندىقتاردىڭ ءبارى ارتتا قالدى. سىزدەردىڭ جاقسى تىلەك، اقجارما كوڭىلدەرىڭىزدىڭ لەبىمەن، دارىگەرلەردىڭ شيپاسىنىڭ ارقاسىندا قازىر قالپىما كەلىپ، جاتتىعۋدى قايتا جالعاستىردىم. ەندىگى ماقسات - كاسىپقوي بوكستىڭ كەز-كەلگەن باسەكەسىندە نامىس وتىن جانىپ، شارشى الاڭدا اتوي سالۋ. سىزدەردىڭ قولداۋ، قۋاتتارىڭىزعا زور العىس»، - دەپ اياقتادى بوكسشى.
