ولگا رىپاكوۆا قۇرلىقارالىق كۋبوكتا جۇلدەگەر اتاندى
ق ر جەڭىل اتلەتيكا فەدەراتسياسى حابارلاعانداي، ازيا قۇرلىعىنان قاتىسقان قازاقستاندىق سپورتشى ولگا رىپاكوۆا ءۇش قارعىپ سەكىرۋدەن كۇمىس جۇلدەگە يە بولدى. جالپى بۇل جارىسقا ءتورت قۇرلىقتىڭ قۇرامالارى قاتىسىپ جاتىر: ەۋروپا، امەريكا، افريكا جانە ازيا-مۇحيت ارالدارى ەلدەرى.
قۇرلىقارالىق كۋبوكتىڭ باعدارلاماسىندا 37 سايىس ءتۇرى ەنگىزىلگەن (18 ءى ەرلەر اراسىندا، 18ءى ايەلدەر اراسىندا جانە 4x400 مەترلىك ارالاس ەستافەتا). ءاربىر سايىس بويىنشا سپورتشىلارعا ۇپاي ۇلەستىرىلەدى.
سول بويىنشا ۇزدىك قۇرلىقتىق كوماندا انىقتالادى. ءبىر سايىس تۇرىنەن ءاربىر قۇرلىقتان 2 سپورتشى قاتىسادى. جارىس ەكى كۇنگە جالعاسادى. كەشە، 8- قىركۇيەك كۇنى قازاقستاندىق ولگا رىپاكوۆا جارىس جولىنا شىعىپ، ەكىنشى ورىنعا يە بولدى. 33 جاستاعى وتانداسىمىز 14.26 مەترگە سەكىردى. وسىدان 9 كۇن بۇرىن رىپاكوۆا جاكارتاداعى ازيا ويىندارىندا دا 14.26 مەتردى باعىندىرعان.
ءۇش قارعىپ سەكىرۋدەن قۇرلىقارالىق كۋبوكتىڭ التىنى امەريكانىڭ اتىنان قاتىسقان وليمپيادا چەمپيونى كولۋمبيالىق كاترين يبارگۋەنگە بۇيىردى. ول چەحيادا 14,76 مەترگە سەكىردى. قولا جۇلدەنى ەۋروپا نامىسىن قورعاعان گرەكيالىق پاراسكيەۆي پاپاحريستۋ ەنشىلەدى - 14,22.
ايتا كەتەيىك، IAAF- تىڭ قۇرلىقارالىق كۋبوگى ەڭ العاش رەت 2010 -جىلى سپليتتە وتكىزىلگەن. حورۆاتيادا قازاقستان اتىنان قاتىسقان ولگا رىپاكوۆا 15.25 مەترگە سەكىرىپ، ازيانىڭ رەكوردىن جاڭارتقان. سونداي-اق، ءوزىنىڭ سپورتتىق كارەراسىنداعى ۇزدىك ناتيجەنى تىركەگەن بولاتىن.
اۆتور: كۇنسۇلتان وتارباي
