استانالىق ونەرپازدار سىر حالقىنا تارتۋ جاسادى
ەلوردانىڭ مادەني كۇندەرى اياسىندا «ماڭگىلىك بالا بەينە» اتتى قۋىرشاق تەاترىنىڭ قويىلىمى، «اق تىلەكپەن، استانا!» كورمەسى جانە قازاقستاندىق ەسترادا جۇلدىزدارىنىڭ قاتىسۋىمەن گالا-كونسەرت ءوتتى.
قىزىلوردا وبلىسىنىڭ اكىمى قىرىمبەك كوشەربايەۆ استانالىق قوناقتاردى 20 جىلدىق مەرەيتويمەن قۇتتىقتاپ، جاڭا جەتىستىكتەر تىلەدى.
«بۇگىندە استانا ەڭ قىسقا مەرزىمدە سالىنىپ، الەمدى سۇيسىنتكەن، جاھاندىق ساۋلەت ونەرىندەگى بىردەن-ءبىر قايتالانباس «عاسىر جوباسىنا» اينالدى. بيىل - استانا قالاسىنىڭ 20 جىلدىق مەرەكەسى وتسە، ەندى قىزىلوردا قالاسىنىڭ 200 جىلدىق مەرەيتويى اتاپ وتىلەدى. قازاقستاننىڭ العاشقى جانە بۇگىنگى استاناسىنىڭ اراسىنداعى وسى ءبىر بايلانىس كوپ نارسەنى اڭعارتسا كەرەك. استانانىڭ 20 جىلدىق مەرەيتويىنا وبلىستان سىي رەتىندە زىمىران - عارىشتىق تەحنيكا مۋزەيىنىڭ اشىق ەكسپوزيتسياسىنىڭ قۇرىلىسى ەلباسىنىڭ قاتىسۋىمەن سالتاناتتى تۇردە اشىلدى. بايقوڭىر عارىش ايلاعى - قازاق حالقىنىڭ عانا ەمەس، بۇكىل ادامزاتتىڭ ماقتانىشىنا اينالعان تاريحي كەشەن»، - دەدى ايماق باسشىسى.
ايتا كەتەيىك، بيىلعى جىلى سىرداريانىڭ سول جاعالاۋىندا استانا ىسپەتتى جاڭا قالا سالىنۋدا، ونىڭ ىشىندە 1925-جىلى ۇلتقا «قازاق» اتاۋىن بەرۋ تۋرالى تاريحي شەشىم قابىلدانعان بۇرىنعى قازواك عيماراتىنىڭ سىزباسىنا سايكەس قايتا جاڭعىرتىلىپ جاتقان «رۋحاني جاڭعىرۋ» ورتالىعى سالىندى.
استانا دەلەگاتسياسى قىزىلوردا وبلىسىنا جاساعان ساپار بارىسىندا ايماقتىڭ تاريحي، مادەني، الەۋمەتتىك جانە ونەركاسىپتىك نىساندارىن ارالاپ كوردى. قارماقشى اۋدانىنداعى قورقىت اتا مەموريالدىق كەشەنى، مەملەكەتتىك رامىزدەر اللەياسى، سول جاعالاۋداعى «رۋحاني جاڭعىرۋ» ورتالىعى، كاسىپكەرلەر پالاتاسى، IT پاركى جانە ت. ب كورنەكى ورىندارىمەن تانىستى.
استانا قالاسىنىڭ قىزىلوردا وبلىسىنداعى كۇندەرى بۇگىندە جالعاسادى. ەلوردادان كەلگەن مەيماندار ءا. تاجىبايەۆ اتىنداعى IT پاركى، «دوستىق ءۇيى» جۇمىسىمەن جانە سىرداريا اۋدانى بەسارىق اۋىلىنىڭ تىنىس-تىرشىلىگىمەن تانىسادى.
