اقمولا وبلىسىندا ونەگەلى وتباسىلارعا قۇرمەت كورسەتىلدى
دوستىق ۇيىندە ۇيىمداستىرىلعان شارادا قۇتتىقتاۋ ءسوز العان وبلىستىق ىشكى ساياسات باسقارماسىنىڭ باسشىسى گۇلجانار شوكەيەۆا ادام ءومىرى وتباسىنان باستالاتىنىن، حالقىمىز اكەنى اسقار تاۋعا بالاعانىن، جۇماق انانىڭ تابانىنىڭ استىندا دەپ انالارعا قۇرمەت كورسەتكەنىن، بالا - باۋىر ەتى دەپ ۇرپاعىنا ايرىقشا قامقورلىق تانىتقانىن ايتا كەلە، اتا-اناعا قۇرمەتپەن قاراپ، الاڭسىز قارتتىقتى سىيلاۋ ءاربىر ادامنىڭ قاسيەتتى بورىشى ەكەنىن جەتكىزدى.
«ەلباسىمىز اتاپ وتكەندەي، وتباسى قازاقستاندىق قوعامنىڭ التىن دىڭگەگى بولىپ تابىلادى. وبلىسىمىزدا وتباسىلىق- دەموگرافيالىق ساياساتتى جۇزەگە اسىرۋ ماقساتىندا وبلىس اكىمى جانىندا ارنايى كوميسسيا جۇمىس ىستەيدى»، دەدى گ. شوكەيەۆا.
سونىمەن قاتار، باسقارما باسشىسى اعىمداعى جىلى زاماناۋي قوعامدا اكەلەر ينستيتۋتىن دامىتۋدىڭ ماڭىزدىلىعى ەسكەرىلە وتىرىپ، وبلىستىق اكەلەر وداعى قۇرىلعانىنىن دا اتاپ ءوتتى.
شارادا كوكشەتاۋ قالاسىندا تۇراتىن ونەگەلى وتباسىلار - مۋسيندەرگە، وماروۆتارعا، بايكوۆسكييلەرگە، جاقىپوۆتارعا، فيلاتوۆتارعا، تولەگەنوۆتارعا، سونىمەن قاتار قيىقوۆتار وتباسىنا العىس حاتتار مەن ەستەلىك سىيلىقتاردى سالتاناتتى جاعدايدا تابىس ەتكەن.
قازاقستان حالقى اسسامبلەياسىنىڭ اقمولا وبلىسى بويىنشا وكىلدىگىنىڭ جانىنداعى انالار كەڭەسىنىڭ ءتورايىمى زەرە قيىقوۆا، «جەنسكي لۋچ» قوعامدىق بىرلەستىگىنىڭ ءتورايىمى وكسانا ولەگوۆنا، جاڭادان قۇرىلعان وبلىستىق اكەلەر وداعىنىڭ ءتوراعاسى مارات قويشين ءسوز سويلەپ، وتباسى قۇندىلىقتارىنا توقتالدى.
ەسكە سالا كەتەيىك، اقمولا وبلىسىندا كوپبالالى انالاردىڭ سانى 7160 ادامدى قۇراپ وتىر. سونىڭ ىشىندە، 2535 «التىن القا»، 4152 «كۇمىس القا» يەگەرلەرى.
