قازاقستان جاستار قۇراماسى سلوۆەنيامەن تەڭ ءتۇستى
بۇل - 2019-جىلعى ەۋروپا بىرىنشىلىگىنە ىرىكتەۋدىڭ كەزەكتى ويىنى، دەپ حابارلايدى قازاقپارات ءتىلشىسى.
ەستەرىڭىزگە سالا كەتەلىك، ءبىزدىڭ جاستار قۇرامامىز 2019-جىلعى ەۋروپا بىرىنشىلىگى ىرىكتەۋ كەزەڭىندە توعىزىنشى توپتا سىنعا ءتۇسىپ كەلەدى. قارسىلاستارى - فرانسيا، سلوۆەنيا، بولگاريا، چەرنوگوريا، ليۋكسەمبۋرگ قۇرامالارى.
بۇگىنگى كۇنگە دەيىن قۇرامامىز 8 ويىن وتكىزدى. ونىڭ 8 دە جەڭىسكە جەتسە، 4 دە تەڭ ءتۇسىپ ءتۇسىپ، 2 دە قارسىلاسىنا ەسە جىبەردى. تۋرنير كەستەسىندە 10 ۇپايمەن ءۇشىنشى ورىندا كەلەدى.
بۇگىنگى قارسىلاسى - سلوۆەنيا ەكەۋى تۋرنير كەستەسىندە قاتارلاس تۇر. بۇگىنگى كەزدەسۋدە جەڭىسكە جەتكەن جاعدايدا ءبىزدىڭ قۇراما ولاردى ارتقا قالدىراتىن ەدى. دەگەنمەن بۇل ويىندا جەڭىمپاز انىقتالعان جوق. قوس قۇراما 0:0 ەسەبىنە قاناعات ءبىلدىردى.
ال بىردە-ءبىر ۇپاي شاشاۋ شىعارماعان فرانسيا قۇراماسى 21 ۇپايمەن تۋرنير كەستەسىندە ءبىرىنشى ورىندا كەلەدى.
بۇدان بۇرىنعى كەزدەسۋلەردە قازاقستان قۇراماسى ليۋكسەمبۋرگتى قوس ويىندا دا 2:1, 3:0 ەسەبىمەن تىزە بۇكتىردى. قوس ويىندا دا فرانتسيادان 1:4, 0:3 ەسەبىمەن جەڭىلىپ قالدى. ال بولگاريامەن ەكى كەزدەسۋىندە دە تەڭ ءتۇسىپ، وندا 2:2, 1:1 ەسەپتەرى تىركەلدى. ال چەرنوگوريامەن ءوز الاڭىندا 1:1 ەسەبىمەن تەڭ وينادى.
ءبىزدىڭ قۇراما كەلەسى كەزدەسۋىن دە سلوۆەنيامەن وتكىزەدى. بۇل ويىن 11- قىركۇيەكتە اتالمىش ەلدە بولادى. ماتچ استانا ۋاقىتىمەن 20.30 دا باستالادى. قۇرامامىز ەۋروپا بىرىنشىلىگى ىرىكتەۋ كەزەڭىندەگى سوڭعى ويىنىن 16- قازاندا سىرت الاڭدا چەرنوگوريامەن قورىتىندىلايدى. اتالمىش ەۋروپا بىرىنشىلىگى 2019-جىلدىڭ 16-30- ماۋسىم ارالىعىندا يتاليا مەن سان-مارينو ەلدەرىندە وتكىزىلەدى. وندا بارلىعى 12 قۇراما باق سىنايدى.
