تالدىقورعاندا جاقسىلىق ۇشكەمپىروۆ جايلى فيلم ءتۇسىرىلىپ جاتىر
بۇگىن تالدىقورعاندىقتار اكتەرلەرمەن كەزدەسىپ، وزدەرىن قىزىقتىرعان ساۋالدارىنا جاۋاپ الدى، دەپ حابارلايدى قازاقپارات ءتىلشىسى.
ءدال قازىرگى ساتتە تالدىقورعانداعى «جاستار» سپورت سارايىنىڭ باستى الاڭى 1980-جىلى ماسكەۋدە وتكەن وليمپيادادان سىر شەرتىپ تۇر. بۇل جەردەگى بارلىق كورىنىس سول زاماننىڭ اعىمىنا الىپ كەلەدى. زالدىڭ ءىشى وليمپيادانى تاماشالاپ، قولداۋ كورسەتىپ جاتقان كورەرمەنگە تولى. وسىلايشا تالدىقورعاندا جاقسىلىق ۇشكەمپىروۆ جايلى فيلمنىڭ ەپيزودتارى قىزۋ ءتۇسىرىلىپ جاتىر.
ال تەاتر اكتەرى ولجاس ساق چەمپيوننىڭ ومىرىندەگى ناعىز ماڭىزدى ءساتتىڭ ءبىرىن سومداۋدا. جاقسىلىق ۇشكەمپىروۆتىڭ جاستىق شاعىنا بەت-الپەتى وتە ۇقساس جىگىت كينوعا ءتۇسۋ ءۇشىن ەكى اي بويى جاتتىققانىن جەتكىزدى.
«مەن وسى فيلمگە ءتۇسۋ ءۇشىن ەكى اي بويى جاتتىعۋ زالىنان شىقپاي دايىندالدىم. وقۋشى كەزىمدە ەركىن كۇرەسكە قاتىسقان بولاتىنمىن. ال مۇندا كلاسسيكالىق كۇرەستەن جاتتىعۋ جاساۋ كەرەك بولدى. سونىمەن قاتار، جاقسىلىق اعامىزدىڭ كوپتەگەن تاسىلدەرىن قايتالاۋ اۋىر ءتيدى. قازىرگى كۇنى وعان دا ەتىم ۇيرەندى»، - دەدى جاستارمەن كەزدەسۋ بارىسىندا ولجاس ساق.
سونداي-اق فيلمدە جاتتىقتىرۋشىنىڭ ءرولىن رەسەي اكتەرى دميتري گۋديم سومدايدى. ال قۇرامادا بىرگە بولعان شاميل مەن رەزانتسيەۆتىڭ رولدەرى نۇرعيسا قۋانىشباي ۇلى مەن رەسەيلىك ارتەم كرىسينگە جۇكتەلگەن.
رەسەي اكتەرى ارتەم كرىسين تالدىقورعاننىڭ تاماشا تابيعاتىنا تامساندى. «بىزدە (رەسەيدە) كۇن بۇلاي تۇسە بەرمەيدى. ال تالدىقورعاندا كۇن ساۋلەسى شۋاعىن كەڭىنەن شاشادى ەكەن. مۇنىڭ ءوزى كوڭىل-كۇيگە جاقسى اسەر ەتەتىنىن بايقادىم»، - دەدى ول.
جالپى فيلمنىڭ ەپيزودتارى تالدىقورعاننان وزگە قالالاردا دا جۇرگىزىلگەن. ماسەلەن، بۇعان دەيىن ءتۇسىرىلىم وسكەمەن قالاسىندا جۇزەگە اسسا، ءبىرشاما بولىگى بەلارۋس مەملەكەتىندە دە تاسپاعا باسىلعان.
كەزدەسۋ سوڭىندا قالا جاستارى اكتەرلەرمەن ەستەلىك سۋرەتكە ءتۇستى.
ايتا كەتۋ كەرەك، اتالعان شارا تالدىقورعاننىڭ قالا كۇنى اياسىندا ۇيىمداستىرىلدى. ال شاھار جۇرتشىلىعى قالا كۇنىن 29-قىركۇيەكتە كەڭ كولەمدە اتاپ وتپەك. باستى مەرەكەگە دەيىن ءبىر اي كولەمىندە تۇرعىنداردىڭ نازارىنا ءتۇرلى شارالار ۇسىنىلۋدا.
