قازاقستاندىق كاسىپورىندار قىتايدا ساۋدا ءۇيىن اشادى
«تاماق جانە اۋىل شارۋاشىلىعى سالاسى وتە جاقسى تاجىريبە كورسەتىپ وتىر. قىتايدا جايىلىمدار مەن ەگىستىك القاپتارى جىل سايىن قىسقارا تۇسۋدە. ال قازاقستاندا ەكولوگيالىق تازا ءوندىرىس بار. بۇل باعىت قازاقستاننىڭ ەكىنشى مۇنايىنا اينالادى. بۇگىن ءبىز قازاقستاندىق جانە قىتايلىق كاسىپورىندار اراسىندا كەلىسسوزدەر جۇرگىزبەكپىز. قازاندا قىتايعا، شانشي ولكەسىنىڭ شيان قالاسىنا ءبىزدىڭ ساۋدا ميسسيامىزدىڭ بارۋى جوسپارلانعان. وندا ىسكەرلىك كەزدەسۋلەردەن بولەك قازاقستاندىق كاسىپورىندار قازاقستاننىڭ ساۋدا ءۇيىن دە اشادى»، - دەدى نۇرالى بوكەيحانوۆ.
ونىڭ سوزىنە قاراعاندا، قازاقستاندىق تاراپقا پايدالانۋ ءۇشىن ارنايى ەكونوميكالىق ايماقتان 5 مىڭ شارشى مەتر ساۋدا الاڭى مەن 10 مىڭ شارشى مەتر بوس قويمالار بەرىلەدى. سونىمەن قاتار دۇكەندەردە ينتەرنەت قولجەتىمدى بولادى. قازاقستان ساۋدا ءۇيىنىڭ اشىلۋى وسى جىلدىڭ 18 - قازانىنا جوسپارلانعان.
«ساۋدا ۇيىنە قازىردىڭ وزىندە 25 وتاندىق ءوندىرۋشى تىركەلگەن. دەگەنمەن، بۇل العاشقى كەزەڭى عانا. تولىقتاي العاندا، بۇل ساۋدا ۇيىنە 100-دەن استام قازاقستاندىق كومپانيا سىيىپ كەتەدى. ساۋدا ۇيىندە وتاندىق وندىرۋشىلەردىڭ ونىمدەرى قويىلىپ، ولار قىتايلىق تۇتىنۋشىلارعا ۇسىنىلادى. ءبىرىنشى كەزەكتە بۇل ساۋدا ءۇيى قىتاي كاسىپكەرلەرى مەن تۇتىنۋشىلارىنا ءبىزدىڭ ونىمدەرىمىزدى تانىستىرۋ قىزمەتىن اتقارادى. ال نەگىزگى ساۋدا- ساتتىق ينتەرنەت تۇعىرناما ارقىلى جۇرگىزىلەدى»، - دەدى ول.
اۆتور: مارلان جيەمباي
