قىتاي كومپانياسى قازاقستاننىڭ دارىلىك شوپتەرىنەن مەديتسينالىق ءونىم شىعارماق
بۇل تۋرالى بۇگىن ەلوردادا وتكەن «ءبىر بەلدەۋ - ءبىر جول» اياسىندا دەنساۋلىق مادەنيەتى مەن يندۋسترياسى دەپ اتالاتىن فورۋم اياسىندا Infinitus كومپانياسى باس ديرەكتورىنىڭ ورىنباسارى سيۋە شوۋچۋن ايتتى، دەپ حابارلايدى قازاقپارات ءتىلشىسى.
«4 - قىركۇيەك كۇنى كومپانيامىزدىڭ فيليالى قازاقستاندا مەملەكەتتىك تىركەۋدەن ءوتتى. قازاقستاندا فيلالىمىزدى اشقاننان كەيىن جەرگىلىكتى ينستيتۋتتارمەن جاڭا ونىمدەر ازىرلەۋ سالاسىنداعى ىنتىماقتاستىقتى جولعا قويعىمىز كەلەدى. ىنتىماقتاستىقتىڭ مول جاڭا مۇمكىنشىلىكتەرىن دە تابۋدى ءجون سانايمىز. سونىمەن قاتار قازاقستان حالقىنىڭ دەنساۋلىق ساقتاۋ سالاسىنداعى قاجەتتىلىكتەرى جايىندا دا كوپ ماعلۇمات الماق ويىمىز بار. جاڭا ونىمدەر ازىرلەۋ ءۇشىن پايدالانۋعا جارامدى جەرگىلىكتى تابيعي رەسۋستاردى دا ىزدەمەكپىز. ءبىز ءۇشىن عىلىمي- زەرتتەۋ جۇمىستارى سالاسىنداعى ىنتىماقتاستىق تا بارىنشا ماڭىزدى»، - دەدى سيۋە شوۋچۋن قازاقپارات تىلشىسىنە بەرگەن سۇحباتىندا.
ونىڭ ايتۋىنشا، قىتايدىڭ 5 مىڭ جىلدان اساتىن ءداستۇرلى مەديتسيناسى بار. قازاقستاننىڭ دا دەنساۋلىق سالاسىنداعى ءداستۇرى قالىپتاسقان. سوندىقتان دا قىتايلىق كومپانيا دەنساۋلىق سالاسىنداعى قازاق مادەنيەتىمەن جان- جاقتى تانىسۋدى جانە دەنساۋلىق ساقتاۋ يندۋسترياسىن دامىتۋدىڭ بىرلەسكەن جولدارىن قاراستىرۋدى كوزدەمەك.
«ەكى ەلدىڭ اراسىنداعى ىنتىماقتاستىق ءۇشىن مول مۇمكىنشىلىكتەر بار ەكەندىگىنە سەنىمىم مول. ال بۇل دەنساۋلىق ساقتاۋ سالاسىندا دامىتۋعا سەپتىگىن تيگىزەرى ءسوزسىز. جالپى، الەمدىك ەكونوميكا دامىعان سايىن دەنساۋلىق ساقتاۋ ماسەلەسى دە كۇنتارتىبىنەن تۇسپەيتىندىگى بەلگىلى جايت. بۇل - جاھاندىق ماسەلە. سوندىقتان تابيعي رەسۋرسقا باي قازاقستانمەن وسى باعىتتا جۇمىس ىستەۋگە نيەت تانىتىپ وتىرمىز»، - دەدى ول.
اۆتور: مارلان جيەمباي
