كوشپەندىلەر ويىندارى: قازاقستاندىق اۋدارىسپاقشىلار بەس كۇمىس جۇلدە يەلەندى

 استانا. قازاقپارات - دۇنيەجۇزىلىك كوشپەندىلەر ويىندارىندا اۋدارىسپاقتان اقتىق كەزەڭگە شىققان قازاقستاندىق بەس اۋدارماشىنىڭ ءبارى دە قىرعىز سپورتشىلارىنان ۇتىلىپ، «كۇمىس» مەدالگە يە بولدى، دەپ حابارلايدى قازاقپارات ءتىلشىسى.

ايتا كەتسەك، كوشپەندىلەر ويىندارىنىڭ بەسىنشى جارىس كۇنى قازاقستاندىق سپورتشىلار 8 مەدال يەلەنىپ، جالپى كوماندالىق ەسەپتە ءۇشىنشى ورىننان كورىنگەن بولاتىن. ق ر مادەنيەت جانە سپورت مينيسترلىگى سپورت جانە دەنە شىنىقتىرۋ كوميتەتىنىڭ باسپا ءسوز حاتشىسى راۋحان توعىمبايەۆا بۇگىن بەس بالۋانىمىز اۋدارىسپاقتان فينالعا شىققانىن حابارلاعان ەدى. بەس بالۋاندى دا فينالدا قىرعىز سپورتشىلارى كۇتىپ تۇرعان.

كوميتەت وكىلى بۇگىن قازاقستاندىق بەس سپورتشى دا فينالدا جەڭىلگەنىن حابارلادى.

ايتا كەتسەك، دۇنيەجۇزىلىك كوشپەندىلەر ويىندارىندا جالپىكوماندالىق ەسەپتە 30 التىن، 25 كۇمىس، 23 قولا مەدالمەن سايىس الاڭىنىڭ يەلەرى - قىرعىز رەسپۋبليكاسى ءبىرىنشى ورىندا كەلە جاتىر. 16 التىن، 9 كۇمىس، 18 قولا مەدالدى ەنشىلەگەن رەسەي كومانداسى ەكىنشى ورىننان كورىنىپ وتىر. ۇشتىكتى 11 التىن، 17 كۇمىس، 21 قولا مەدالمەن قازاقستان تۇيىندەيدى.