نازاربايەۆ قاراعاندىدا جاس جۇبايلارمەن سۋرەتكە ءتۇستى
قاراعاندى وبلىسىنا جۇمىس ساپارى بارىسىندا ەلباسى جاس جۇبايلاردىڭ نەكە قيۋ ءراسىمى ءوتىپ جاتقان جاڭا «اق ساراي» سالتانات سارايىنا باردى. قازاقستان پرەزيدەنتى جاس وتاۋ يەلەرىن قۇتتىقتاپ، ولارعا باقىت، شاڭىراقتارىنا بەرەكە تىلەدى.
«ەرتەڭ قازاقستاندا وتباسى كۇنى اتالىپ وتەدى. كوپ ادام ءۇشىن باقىت دەگەنىمىز - وتباسى جانە بالالارى. سىزدەردى ومىرلەرىڭىزدەگى ەڭ جارقىن وقيعامەن قۇتتىقتايمىن!»، - دەدى نۇرسۇلتان نازاربايەۆ.
مەملەكەت باسشىسى وتباسى ينستيتۋتىن نىعايتۋدىڭ جانە ەلىمىزدىڭ جاس ۇرپاعىن تاربيەلەۋدىڭ ماڭىزدىلىعىن اتاپ ءوتتى. جاس شاڭىراق يەلەرى قازاقستان پرەزيدەنتىنە جاس وتباسىلاردى قولداۋ باعىتىندا جۇرگىزىلىپ جاتقان ساياساتى ءۇشىن، سونىڭ ىشىندە «7-20-25» باعدارلاماسى ءۇشىن العىس ءبىلدىردى. جاڭا سالتانات سارايى «رۋحاني جاڭعىرۋ» باعدارلاماسى اياسىندا جەكە كاسىپكەردىڭ قاراجاتىنا سالىنعان.
