قاراعاندىدا تاتۋلاستىرۋ ورتالىعى اشىلدى

قاراعاندى. قازاقپارات - قاراعاندىدا كاسىپوداقتار ۇيىندە تاتۋلاستىرۋ ورتالىعى اشىلدى، ول مەدياتسيا نەگىزىندە جۇمىس ىستەيتىن بولادى، دەپ حابارلايدى ءوڭىر باسشىسىنىڭ رەسمي سايتى.

وسىعان دەيىن ق ر جوعارعى سوتى مەن قازاقستاننىڭ كاسىپوداقتار فەدەراتسياسى بىتىمگەرلىك ءىس-ارەكەتىندە ءوزارا ارىپتەستىك تۋرالى مەموراندۋمعا قول قويعان بولاتىن. قازاقستاندا مەدياتسيانى دامىتۋ مەملەكەتتىك ساياساتتىڭ ماڭىزدى بولىكتەرىنىڭ ءبىرى بولىپ تابىلادى.

تاتۋلاستىرۋ ورتالىعى بارلىق كۇش-جىگەرىن داۋدى سوتقا دەيىن شەشۋ، شيەلەنىستەردى، ونىڭ ىشىندە ەڭبەك سالاسىنداعى شيەلەنىستەردى شەشۋگە باعىتتايتىن بولادى. وعان قوعام قايراتكەرى جانە كاسىبي مەدياتور تاتيانا ساۆيتسكايا باسشىلىق ەتەدى.

ورتالىقتا وتباسىلىق جانە ىسكەرلىك اڭگىمە قۇرۋعا ارنالعان بولمەلەر بار.

- بۇگىندە وبلىسىمىزدىڭ بارلىق سوتتارىندا سوت مەدياتسياسى رەتىندە تاتۋلاستىرۋ پروتسەدۋرالارىن وتكىزۋگە ارنالعان كابينەتتەر بار. مەدياتسيا ورتالىعى قاراعاندى قالاسىنداعى دوستىق ۇيىندە قىزمەت ەتەدى. اۋداندىق جانە اۋىلدىق اكىمدىكتەردىڭ جانىندا كاسىبي ەمەس مەدياتورلاردىڭ قاتىسۋىمەن تاتۋلاستىرۋ پروتسەستەرىن وتكىزۋگە ارنالعان 77 كابينەت اشىلعان، - دەپ اتاپ ءوتتى قاراعاندى وبلىستىق سوتىنىڭ ازاماتتىق ىستەر جونىندەگى سوت القاسىنىڭ ءتورايىمى جاننا سەيدالينا.

رەسپۋبليكامىزدىڭ اۋداندىق سوتتارىندا ازاماتتىق داۋلاردى قاراستىرۋدا «سوتتاعى تاتۋلاستىرۋ پروتسەدۋرالارى» پيلوتتىق جوباسى ىسكە قوسىلدى. وعان قاراعاندى وبلىستىق سوتى مەن قاراعاندى قالاسى وكتيابر اۋدانىنىڭ №3-اۋداندىق سوتى قاتىستى.

تاتۋلاستىرۋ ورتالىعى قاراعاندى قالاسى، ءاليحانوۆ كوشەسى 5، 202-كابينەت مەكەنجايى بويىنشا ورنالاسقان.

تەلەفوندار: 87212413134؛ 87084363696.

ايتا كەتەر جايت، از قامتىلعان ازاماتتار، مۇگەدەكتەر جانە زەينەتكەرلەر بۇل قىزمەتتەردى تەگىن پايدالانا الادى. ءبىرقاتار ازاماتتار ساناتتارى ءۇشىن جەڭىلدىكتەر قاراستىرىلعان.