ۇلتتىق سپورت تۇرلەرىنە دەگەن قىزىعۋشىلىق ارتىپ كەلەدى - مامان

الماتى. قازاقپارات - الماتىدا «سپورت مەنىڭ اۋلامدا» باعدارلاماسى اياسىندا ءار اپتا سايىن كوپتەگەن جارىستار مەن ۇلتتىق سپورت تۇرلەرىنەن شەبەرلىك ساباقتارى وتەدى، دەپ حابارلايدى قازاقپارات اقپاراتتىق جانە سپورتتىق ح ا ب- قا سىلتەمە جاساپ.

«حالىقتىق- ۇلتتىق سپورت تۇرلەرى جانە بۇقارالىق دەنەشىنىقتىرۋ-ساۋىقتىرۋ» كلۋبىنىڭ جەتەكشىسى نۇرعيسا نۇرعاليەۆتىڭ ايتۋىنشا، اتالمىش كلۋب جاستاردى اسىق اتۋ، توعىزقۇمالاق، بەس تاس، قازاق كۇرەسى، قول كۇرەسى، گىر كوتەرۋ سياقتى سپورتتارعا باۋليدى.

«ولاردى ءبىز «سپورت مەنىڭ اۋلامدا» باعدارلاماسىنا جازىلعان بالالارعا ۇيرەتەمىز. وسى سپورت تۇرلەرى بويىنشا الماتىنىڭ ءار اۋدانىنان كەلگەن ءارتۇرلى جاستاعى بالالار مەن جاس وسپىرىمدەرگە جارىستار مەن شەبرلىك ساباقتارىن وتكىزىپ تۇرامىز»، - دەيدى نۇرعيسا نۇرعاليەۆ.

ونىڭ سوزىنشە، وسى جىلدىڭ باسىنان بەرى 455 شەبەرلىك ساباقتارى مەن 350 دەن استام تۋرنيرلەر ۇيىمداستىرلىپ، وعان 20 مىڭداي ادام قاتىسقان.

«جالپى ءبىزدىڭ كلۋبتا 330 ادام تىركەلگەن. ونىڭ 20 ى كوپتەگەن جەتىستىكتەرى بار باپكەرلەر مەن نۇسقاۋشىلار. وسىلايشا، ءبىز ءار اپتا سايىن ءىس-شارالار ۇيىمداستىرامىز. شىندىعىنا كەلەتىن بولساق 10-13 جىل بۇرىن ۇلتتىق ويىندار مەن سپورتتار قالا تۇرعىندارى مەن قوناقتارى اراسىندا بۇگىنگىدەي دامىماعان بولاتىن. قازىر ءبارى باسقاشا. جازعى مەزگىلدە ءبىز بالالاردىڭ نازارىن اۋدارىپ، ۇلتتىق ويىندارعا دەگەن قىزىعۋشىلىقتارىن ارتتىرۋ ءۇشىن ۇرلەنەتىن اتتراكتسيوندار پايدالاندىق. سونىن ارقاسىندا ءبىز ولاردىڭ سانىن كوبەيتتىك. سونداي-اق، قاتىسۋشىلاردىڭ اراسىندا توعىزقۇمالاق پەن اسىق اتۋ ويىندارى دا سۇرانىسقا يە. ءتىپتى، ۇلكەندەردىڭ وزدەرى دە قىزىعىپ ءبىر-بىرىمەن جارىسىپ جاتاتىن كەزدەر دە بولادى.

جاقىندا، قازان ايىندا الماتىدا ءبىز وسى جوعارى دا اتالىپ وتكەن 6 سپورت ءتۇرى بويىنشا فەستيۆال وتكىزەمىز دەگەن جوسپار قۇرىپ وتىرمىز. ونىڭ ماقساتى سالاۋاتتى ءومىر سالتىن ءناسيحاتتاپ، ۇلتتىق سپورت تۇرلەرىن دامىتۋ. بۇنىن بارلىعى الماتى قالاسى دەنە شىنىقتىرۋ جانە سپورت باسقارماسىنىڭ قولداۋىمەن وتەدى. سوندىقتان مەن قالا اكىمدىگىنە ءوز العىسىمدى بىلدىرگىم كەلەدى، - دەيدى نۇرعيسا نۇرعاليەۆ.