تۇركيادا قالعان ءسابيدى الدىرۋعا ساناۆياتسيا ۇشاعىن جىبەرە الامىز - سىرتقى ىستەر مينيسترلىگى

الماتى. قازاقپارات - ق ر س ءى م قازاقستاندىق وتباسىنىڭ تۇركيادا قالعان ەكى ايلىق ءسابيىنىڭ ارتىنان ساناۆياتسيا ۇشاعىن جىبەرۋگە دايىن، دەپ حابارلايدى قازاقپارات ءتىلشىسى.

ۆەدومستۆو مالىمەتىنشە، ۆاسيليەۆتەر وتباسىنىڭ ماسەلەسىن سىرتقى ىستەر مينيسترلىگى ءوز باقىلاۋىنا العان.

 «قازىر تۇركياداعى كلينيكا اكىمشىلىگىمەن قىزمەت باعاسىن ازايتۋ ءۇشىن مامىلەگە كەلىپ جاتىرمىز. تۇرىك دارىگەرلەر كەڭەسى ءسابيدى تاسىمالداۋ ماسەلەسىن جاقىن ارادا شەشۋ كەرەك. ەگەر ولار بالانىڭ رەيس ۇشاعىن كوتەرەتىن جاعدايى بار دەسە، سونداي- اق ارنايى بورت قاجەتتىلىگىن ايتسا ساناۆياتسيا ۇشاعىن جىبەرەمىز»، - دەدى ق ر  س ءى م رەسمي وكىلى ايبەك سمادياروۆ.

 ءوز كەزەگىندە ءسابيدىڭ اناسى بەلگىسىز جومارتتىڭ قولىنا 20 مىڭ دوللار ۇستاتقانىن ايتتى.

 «قازىر مەن قىزىمدى ەلگە قايتارۋ ءۇشىن سىرتقى ىستەر مينيسترلىگىمەن كەلىسىمگە كەلىپ جاتىرمىن. بۇدان باسقا ەشتەڭە ايتا المايمىن. تۇركيا كونسۋلدىعىمەن سويلەسۋدەمىن. ماعان قىزىمنىڭ جاعدايىن ءبىلۋ ماڭىزدىراق. مەنىڭ بەلگىسىز ادامنان 20 مىڭ دوللار العانىم راس»، - دەدى داريا ۆاسيليەۆا.

 ەسكە سالايىق، الماتىلىق داريا ۆاسيليەۆا نارەستەسىن تۇركيادا ۋاقىتىنان ەرتە دۇنيەگە اكەلگەن. سالماعى 750 گرام بولىپ تۋعان قىز بالانى بوسانعان كلينيكاعا بەرەشەگى ءۇشىن قالدىرعان. ءسابيىن تاستاپ قايتىپ كەلگەن اتا- انا ۇشاق رەيسىنىڭ تاياپ، ونىڭ ۇستىنە اقشاسىز قالعانىن ايتىپ اقتالادى. 25 - شىلدە كۇنى ولاردىڭ قارىزى 15 مىڭ ا ق ش دوللارىنا جەتكەن.

اۆتور: ارايلىم جولداسباي