اۋعانستان ايەلدەرى قازاقستان مەن وزبەكستاندا ءبىلىم الاتىن بولدى
بۇل تۋرالى ەۋروپالىق ديپلوماتيانىڭ جەتەكشىسى فەدەريكا موگەريني مالىمەدى. ول استانادا وتكەن اۋعان ايەلدەرىنىڭ قۇقىقتارىن كەڭەيتۋ جونىندەگى حالىقارالىق كونفەرەنسيا قاتىسۋشىلارىنا بەينەۇندەۋىن جولداعان بولاتىن.
«بۇگىندە اۋعانستاندا 3 ميلليونداي قىز مەكتەپتە وقىپ ءجۇر، ال ستۋدەنتتەرىنىڭ بەستەن ءبىر بولىگى - نازىكجاندىلار. الايدا اۋعانستان ايەلدەرىنە ءالى كۇنگە دەيىن تىرشىلىگىنىڭ بۇكىل سالالارىندا قىسىم جاسالىپ ءجۇر. سول سەبەپتەن ولارعا قولداۋىمىزدى جالعاستىرۋمىز قاجەت»، - دەيدى فەدەريكا موگەريني.
فەدەريكا موگەريني، ە و سىرتقى ساياساتى جونىندەگى كوميسسارى:
- ەۋرووداق اۋعانستان ايەلدەرىنە ۇنەمى قولداۋ كورسەتىپ ءجۇر. بۇگىن ولارعا ورتالىق ازيادا ءبىلىم الۋعا مۇمكىندىك بەرەتىن 2 ميلليون ەۋرونىڭ جاڭا باعدارلاماسىن ۇسىنىپ وتىرمىن. بۇل ايەلدەردىڭ ەكونوميكالىق مۇمكىندىكتەرى مەن وزگەلەردەن تاۋەلسىزدىگىن ارتتىرادى. باعدارلاما قازاقستان، وزبەكستان جانە اۋعانستاننىڭ ءۇشجاقتى ىنتىماقتاستىعىمەن جۇزەگە اسادى. ورتالىق ازياداعى كورشىلەردىڭ قولداۋى بۇل ەلگە اۋاداي قاجەت. بەيبىتشىلىك، ايماقتاعى تىعىز ەكونوميكالىق ىنتىماقتاستىق پەن ءوزارا ارەكەتتەسۋ بۇكىل اۋعان حالقى مەن تۇگەل ايماققا پايدا اكەلەتىنى انىق.
www.24.kz
