گۇلشارا ءابدىقالىقوۆا وتباسىلار ءجيى تاپ بولاتىن نەگىزگى تۇيىتكىلدەردى اتادى

استانا. قازاقپارات - ق ر مەملەكەتتىك حاتشىسى گۇلشارا ءابدىقالىقوۆا قازاقستانداعى وتباسىلار تاپ بولاتىن نەگىزگى ءتورت ماسەلەنىڭ قانداي ەكەنىن ايتىپ بەردى، دەپ حابارلايدى قازاقپارات ءتىلشىسى.

«ءبىزدىڭ ەلىمىزدە تۇرمىستىق زورلىق-زومبىلىق ماسەلەلەرىن شەشەتىن 31 داعدارىس ورتالىعى جۇمىس ىستەيدى. تۇركىستان وبلىسىندا «وتباسىنداعى زورلىق-زومبىلىقسىز قازاقستان» دەگەن جوبا جۇزەگە اسىرىلىپ جاتىر. بۇل پيلوتتىق جوبا ەندى عانا باستالدى. ءبىز ونى اياعىنا دەيىن جەتكىزۋىمىز كەرەك»، - دەدى مەملەكەتتىك حاتشى استانادا وتكەن «قازاقستاندىق قوعامدى جاڭعىرتۋ پروتسەسىندەگى وتباسىنىڭ ءرولى» اتتى دوڭگەلەك ۇستەل وتىرىسىندا.

مەملەكەتتىك حاتشى سونىمەن بىرگە وتباسىلىق ينستيتۋتتارمەن بىرلەسە وتىرىپ شەشەتىن ماسەلەلەردى اتادى.

«بىرىنشىدەن - بۇل ەرتە جاستاعى نەكە مەن جاس وسپىرىمدەردىڭ جۇكتىلىگى، ەرتە جاستا تۇسىك جاساتۋ. ەكىنشىدەن، كوبەيۋ تەندەنتسياسىنا يە - اجىراسۋ ماسەلەسى. ءاربىر ءۇشىنشى وتباسى قازىر اجىراسىپ كەتىپ جاتىر. ءۇشىنشىسى - جالقى (تولىققاندى ەمەس) وتباسىلاردىڭ كوبەيۋى. قازىرگى تاڭدا بالالاردى تاربيەلەۋدە اكەلەردىڭ از ارالاسۋى مەن بالا كۇتىمى ءۇشىن اليمەنت تولەمدەرىندەگى ماسەلە. ءتورتىنشىسى - وتباسى باعىتىنداعى جۇمىس نەگىزىنەن ومىرلىك قيىندىقتار باستالعان كەزدە جۇرگىزىلەدى. الدىن الۋ جۇمىستارى ءالى ءالسىز جۇرۋدە. ەلىمىزدە مۇنداي وزەكتى ماسەلەلەردى شەشۋگە جۇمىلاتىن ناقتى مەملەكەتتىك ورگان - قوعامدىق دامۋ مينيسترلىگى. كونسۋلتاتيۆتىك ورگان رەتىندە ءبىزدىڭ كوميسسيا دا كەڭەس جۇرگىزىپ، اتالعان ماسەلەلەردى شەشۋدە ۇسىنىستارىن جولدايتىن بولادى»، - دەدى گۇلشارا ءابدىقالىقوۆا.