13:56, 06 - قىركۇيەك 2018 | GMT +5
جەدەل جاردەم دارىگەرلەرى ولەيىن دەپ جاتقان قاريانىڭ سوڭعى ارمانىن ورىندادى
استانا. قازاقپارات - كۆينسلەند قالاسىندا جەدەل جاردەم دارىگەرلەرى قاتەرلى ىسىك سالدارىنان دەمى ۇزىلەيىن دەپ جاتقان 72 جاستاعى رون ماككارتنيدىڭ سوڭعى تىلەگىن ورىندادى. فەلدشەرلەر ونىڭ جاقسى كورەتىن بالمۇزداعىن الۋ ءۇشىن «ماكدونالدسقا» بارۋعا كەلىسكەن.
بۇل تۋرالى Daily Mail باسىلىمى حابارلايدى.
«انام ەكەۋىمىز جەدەل جاردەم دارىگەرلەرىنە قالاي العىس بىلدىرەتىنىمىزدى بىلمەيمىن. ولار اكەمنىڭ جاعدايى ناشارلاعان سايىن كەلىپ تۇردى»، - دەيدى روننىڭ قىزى.
رون ماككارتني قاتەرلى ىسىكتەن زارداپ شەككەن. ول ولەر الدىندا تەك ءبىر نارسەنى جاساپ ۇلگەرگىسى كەلىپتى - ءوزىنىڭ سۇيىكتى ءتاتتىسىن جەۋ. قاريانىڭ قىزىنىڭ ايتۋىنشا، بالمۇزداق - اكەسىنىڭ وزدىگىنەن جەي الاتىن جالعىز اسى بولعان.
«روننىڭ ايەلى ونىڭ سوڭعى ەكى كۇن بويى ءنار تاتپاعانىن ايتتى. سول كەزدە ءبىز ودان: «ەگەر بىردەڭە جەي الساڭ، نەنى تاڭدار ەدىڭ؟» - دەپ سۇرادىق. ناۋقاس: «جەمىس قوسىلعان كارامەلدى بالمۇزداق»، - دەپ جاۋاپ بەردى»، - دەيدى جەدەل جاردەم قىزمەتكەرى.
