بيىل قازاقستاننىڭ اۋە كەڭىستىگىندە قانشا ۇشاققا قىزمەت كورسەتىلدى
«2018 -جىلدىڭ 8 ايىندا قازاقستان رەسپۋبليكاسىنىڭ اۋە كەڭىستىگى ارقىلى ۇشقان ءارى قىزمەت كورسەتىلگەن ۇشاقتاردىڭ سانى 171845-كە جەتتى. بۇل 2017 -جىلدىڭ سايكەس كەزەڭىمەن سالىستىرعاندا 9522-گە ارتىق، ياعني اۋە ساپارلارىنىڭ كولەمى 5,87 پايىزعا ارتتى. قازاقستاندىق اۋە كومپانيالارى 66489 رەت، ال شەتەلدىك اۋە كومپانيالارى 105356 رەت ۇشقان»، - دەپ اتاپ وتىلگەن ق ر ي د م باسپا ءسوز قىزمەتىنىڭ مالىمەتىندە.
بەلگىلى بولعانداي، ەلىمىزدىڭ اۋە كەڭىستىگى ارقىلى 2018 -جىلدىڭ قاڭتار- تامىز ايلارىندا تۇراقتى ترانزيتتىك ساپارلار سانى 76431-گە جەتكەن. بۇل وتكەن جىلدىڭ سايكەس كەزەڭىمەن سالىستىرعاندا 5328-گە (+ 7.49 پايىز) ارتىق.
«شەتەلدىك اۋە كومپانيالارىنىڭ چارتەرلىك ساپارلارىنىڭ ءوسىمى +18,89 پايىزدى قۇرادى (2017 -جىلى 6621 رەيستەن 2018 -جىلى 7872-گە دەيىن). ترانزيتتىك قوزعالىستىڭ ارتۋى شەتەلدىك اۋە كومپانيالارىنىڭ تۇراقتى رەيستەرىنىڭ جيىلىگىنىڭ كوبەيۋىمەن بايلانىستى. قازاقستاننىڭ اۋەجايلارىنا قونعان شەتەلدىك اۋە كومپانيالارىنىڭ تۇراقتى رەيستەرىنىڭ ورىندالۋ سانى 2018 -جىلدىڭ قاڭتار- تامىز ايلارىندا 15221-گە جەتتى. وسى كورسەتكىش وتكەن جىلدىڭ سايكەس كەزەڭىنە قاراعاندا 354-كە (+ 2.38 پايىز) ارتىق»، - دەلىنگەن حابارلامادا.
اۆتور: رۋسلان عابباسوۆ
