قوس كورەيا باسشىلارى ءۇشىنشى كەزدەسۋدىڭ ۋاقىتىن بەلگىلەدى
بۇل تۋرالى پحەنيانعا ساپارىنان كەيىن سەۋلدە بريفينگ وتكىزگەن پرەزيدەنتتىڭ ارنايى ەلشىسى مۋن چون ىي ەن ءمالىم ەتتى، دەپ حابارلايدى قازاقپارات رەنحاپقا سىلتەمە جاساپ.
چوننىڭ ايتۋىنشا، كورەيا رەسپۋبليكاسى مەن كحدر پحەنياندا ءۇشىنشى ءسامميتتى وتكىزۋگە، سونداي- اق كەلەسى اپتانىڭ باسىندا اتالمىش سامميت تۋرالى تالقىلاۋ ءۇشىن جوعارى دەڭگەيدەگى كەلىسسوزدەر وتكىزۋگە كەلىسكەن.
مۋن چجە ين مەن كيم چەن ىن العاش رەت 27- ساۋىردە پانمۋندجوم اۋىلىندا كەزدەسكەن ەدى. ال ەكىنشى مارتە 26- مامىردا جۇزدەستى.
چوننىڭ مالىمدەۋىنشە، الداعى سامميتتە ەكى ەل باسشىلارىنىڭ پانمۋندجومداعى ءبىرىنشى كەزدەسۋىندە قول جەتكىزىلگەن جوعارى دەڭگەيدەگى كورەياارالىق كەلىسىمدەردىڭ جۇزەگە اسىرىلۋ بارىسى قارالادى.
باسپا ءسوز ءماسليحاتىندا اتاپ وتىلگەندەي، سولتۇستىك كورەيا كوشباسشىسى كورەيا تۇبەگىن تولىقتاي يادرولىق قارۋسىزداندىرۋعا ۇستامدىلىعىن راستاپ، وڭتۇستىك كورەيامەن عانا ەمەس، سونداي-اق قۇراما شتاتتارمەن تىعىز ىنتىماقتاستىق جاساۋعا دايىن ەكەندىگىن جەتكىزگەن.
مەملەكەت باسشىلارى سامميت بارىسىندا، سونداي-اق سەۋل مەن پحەنيان اراسىنداعى اسكەري شيەلەنىستى ودان ءارى تومەندەتۋ جولدارىن تالقىلاماق.
«ەكى ەل ءوزارا سەنىمدى نىعايتۋدىڭ ناقتى جولدارى مەن قارۋلى قاقتىعىستاردىڭ الدىن الۋدى تالقىلاۋعا كەلىستى»، - دەدى چون.
وسى ماقساتتا تاراپتار ءۇشىنشى سامميت باستالعانعا دەيىن كەسون قالاسىندا بىرلەسكەن بايلانىس بولىمدەرىن اشۋعا ۋاعدالاسقان.
