ماماندىقتار رەيتينگى قالاي جاسالادى
قازىردىڭ وزىندە مەكتەپ تۇلەكتەرى قاي ۋنيۆەرسيتەتتى بىتىرگەننەن كەيىن جۇمىسقا تۇرۋ مۇمكىندىگى جوعارى بولاتىنىن كورە الادى، دەپ حابارلايدى قازاقپارات ءتىلشىسى.
«اتامەكەن» ۇ ك پ ادامي كاپيتالدى دامىتۋ دەپارتامەنتىنىڭ ساراپشىسى اينۇر ىبىجانوۆانىڭ ايتۋىنشا، جىلدىڭ اياعىنا دەيىن 2 مىڭ وقۋ باعدارلاماسىنىڭ تيىمدىلىگىن زەردەلەپ شىعۋ جوسپارلانعان.
«قازىر ءبىز 33 ماماندىقتىڭ رەيتينگىن جاريالادىق. «اتامەكەننىڭ» رەسمي سايتىنا كىرسەڭىز، «وقۋ باعدارلامالارىنىڭ رەيتينگى» دەگەن ءبولىم بار. سونىڭ ىشىندە 33 ماماندىقتىڭ ءتىزىمى بەرىلگەن. ماسەلەن، «اۆتوماتتاندىرۋ جانە باسقارۋ» دەگەن ماماندىقتى اشساڭىز، 26 جوعارى وقۋ ورنىنىڭ ءتىزىمى شىعادى. ءبىز سونىڭ ءبارىن زەردەلەپ، ۋنيۆەرسيتەتتەردى مامان دايارلاۋدىڭ تيىمدىلىگى بويىنشا ورنالاستىردىق. وسىلايشا، ءاربىر ماماندىق بويىنشا جوعارى وقۋ ورىندارىنىڭ رەيتينگى ازىرلەندى. زەرتتەۋ كەزىندە جۇمىسقا ورنالاسقان تۇلەكتەردىڭ پايىزى مەن ولاردىڭ ورتاشا ەڭبەكاقىسى، وقۋ باعدارلاماسىنىڭ وزەكتىلىگىنە باسا نازار اۋدارىلدى. بۇدان بولەك، تۇلەكتەردىڭ اراسىندا ساۋالناما دا جۇرگىزىلەدى. ولار دا جوعارى وقۋ ورنىندا العان ءبىلىمنىڭ قانشالىقتى پايدالى بولعانىن ايتادى»، - دەدى ا. ىبىجانوۆا قازاقپارات تىلشىسىنە بەرگەن سۇحباتىندا.
ونىڭ سوزىنە قاراعاندا، رەيتينگتى ازىرلەۋ شارالارى ەكى كەزەڭنەن تۇرادى. ءبىرىنشى كەزەڭدە ق ر ءبىلىم جانە عىلىم مينيسترلىگىنەن ءتيىستى مالىمەتتەر الىنادى. سونىڭ نەگىزىندە بىلتىرعى تۇلەكتەردىڭ جۇمىسقا ورنالاسۋ پايىزى مەن ورتاشا ەڭبەك اقىسىنا، پروفەسسور- وقىتۋشىلار قۇرامىنىڭ تاجىريبەسىنە، ءبىلىم بەرۋ باعدارلامالارىنا سالىنعان ينۆەستيتسيالارعا، جۇمىس بەرۋشىمەن بىرگە ازىرلەگەن ءبىلىم بەرۋ باعدارلامالارىنا، سونداي- اق، حالىقارالىق اككرەديتاتسياعا ساراپتاما جۇرگىزىلەدى.
ەكىنشى كەزەڭدە سالالىق ساراپشىلار ءبىلىم بەرۋ باعدارلامالارىنىڭ مازمۇندىق الشاقتىعىن تالداپ شىعادى. «ماسەلەن، تۇلەكتەر مەن ولاردىڭ جۇمىسقا ورنالاسۋى تۋرالى مالىمەتتەر جوعارى ءبىلىمدى باسقارۋدىڭ ءبىرىڭعاي جۇيەسىنەن الىنادى. سوسىن ءبىز ونىڭ ءبارىن ءبىلىم جانە عىلىم مينيسترلىگى بەرگەن مالىمەتتەرمەن سالىستىرامىز»، - دەپ اتاپ كورسەتتى ا. ىبىجانوۆا.
ايتا كەتكەن ءجون، ماماندىقتار رەيتينگى - «اتامەكەن» ۇ ك پ- نىڭ باستاماسى. نەگىزگى ماقسات - جۇمىس بەرۋشى مەن جوعارى وقۋ ورىننىڭ اراسىنداعى بايلانىستى نىعايتۋ. سەبەبى بۇگىندە تەوريا مەن پراكتيكانىڭ الشاقتىعى بار. سونىڭ سالدارىنان جوعارى وقۋ ورنىڭ بىتىرگەن جاستار جۇمىس تابا الماي جاتادى. ال جۇمىس بەرۋشىلەرگە جاس مامانداردى قايتا دايارلاۋعا تۋرا كەلەدى. وعان دا ءبىراز ۋاقىت تا، قاراجات تا كەتەدى.
«نەگىزى، شەتەلدە اتا- انالار مەن مەكتەپ تۇلەكتەرى وسى ىسپەتتى رەيتينگتەردى مۇقيات باقىلاپ وتىرادى. سەبەبى ۋنيۆەرسيتەتتىڭ وقۋ باعدارلاماسى مىقتى بولسا، ونى وقىپ شىققاننان كەيىن جاقسى جۇمىس تا، جوعارى جالاقى دا بولادى»، - دەيدى ا. ىبىجانوۆا.
اۆتور: ارمان اسقاروۆ
