ناۋقاستىڭ امان قالۋى جەدەل جاردەم قىزمەتىنە تىكەلەي بايلانىستى - ەلجان ءبىرتانوۆ
شارادا رەسەي، يزرايل، قىتاي جانە مالايزيادان كەلگەن ماماندار ءوز تاجىريبەلەرىمەن ءبولىستى. يزرايلدىك ماماندار توتەنشە وقيعادا زارداپ شەككەندەرمەن جۇمىس ىستەۋ تاسىلدەرىن كورسەتسە، قىتاي ماماندارى - جاڭا تەحنولوگيالار جونىندە اڭگىمەلەدى. مالايزيالىقتار ناۋقاستى ەمدەۋگە كومەكتەسەتىن شوپتەر تۋرالى، رەسەيلىكتەر - جۇرەك- وكپە رەانيماتسياسى تۋرالى باياندادى.
شەبەرلىك ساباعىنا ق ر دەنساۋلىق ساقتاۋ ءمينيسترى ەلجان ءبىرتانوۆ تا قاتىستى.
«مەن ءۇشىن جەدەل مەديتسينالىق كومەك - بازالىق ماماندىق. باسىمدىق بەرەتىن جەكە كاسىبي ماقساتىم دا - ەلىمىزدەگى جەدەل جاردەم قىزمەتىن جەتىلدىرۋ. بۇگىندە ءدال وسى شۇعىل مەديتسينالىق كومەك ماسەلەلەرى اسا وزەكتى بولىپ وتىر. حالىقتىڭ ءومىر ءسۇرۋ جاسىن ۇزارتۋ - مەملەكەت دامۋىنداعى، دەنساۋلىق ساقتاۋ جۇيەسىندەگى ستراتەگيالىق ينديكاتورلاردىڭ ءبىرى بولىپ تابىلادى. سوزىلمالى اۋرۋمەن نەمەسە قارتتىقپەن بايلانىسى جوق اياقاستى ءولىم بۇل كورسەتكىشكە ايتارلىقتاي ىقپال ەتەدى. وكىنىشكە قاراي، بىزدەگى بۇل كورسەتكىش كوڭىل كونشىتەرلىكتەي ەمەس. ەلىمىزدە جاراقاتتان، ۋلانۋدان جانە وزىنە ءوزى قول سالۋدان بولاتىن ءولىم دەڭگەيى جوعارى»، - دەدى مينيستر.
سونىمەن بىرگە، مينيستر دامىعان ەلدەرمەن سالىستىرعاندا قازاقستاندا اۋرۋحاناعا دەيىنگى نەمەسە العاشقى تاۋلىكتە قايتىس بولۋ دەڭگەيى جوعارى ەكەنىن اتاپ ءوتتى. ە. ءبىرتانوۆ مۇنى مەديتسينا قىزمەتكەرلەرىنىڭ كاسىبيلىگىمەن ەمەس، ينفراقۇرىلىممەن، جابدىقتاۋمەن، جەدەل جاردەم قىزمەتىن دۇرىس ۇيىمداستىرۋمەن بايلانىستى ەكەنىن جەتكىزدى.
«كوپتەگەن دامىعان ەلدەردە 40-50 جاستا ميوكارد ينفاركتىنەن قايتىس بولۋ سيرەك كەزدەسەدى، ال بىزدە بۇل وقيعالار ءجيى ورىن الادى. مۇندا ارينە، الدىن الۋ، اۋرۋدى ەرتە انىقتاۋ ماسەلەلەرى دە بار. ءبىراق، ءتۇپتىڭ تۇبىندە شۇعىل جاعداي بولادى جانە بارلىعى جەدەل جاردەم قىزمەتكەرلەرىنە، قابىلداۋ بولىمىنە تىكەلەي بايلانىستى بولادى. سوندىقتان، وتكەن جىلدان باستاپ، ءدال وسى باعىتتاعى جۇمىستاردى كۇشەيتتىك. جاڭا ستاندارتتار مەن بۇيرىقتار قابىلدادىق»، - دەپ تۇيىندەدى ەلجان ءبىرتانوۆ.
اۆتور: ايجان سەرىكجان قىزى
