تۇركيا سيريامەن اراداعى شەكاراعا اۋىر تەحنيكاسىن اپاردى

استانا. قازاقپارات - تۇركيا مەملەكەتى سيريامەن شەكارالاساتىن وڭىرگە اۋىر تەحنيكاسىن تارتىپ جاتىر. شام ەلىنىڭ يدليب ايماعى سودىرلار شوعىرلانعان سوڭعى بەكىنىستەردىڭ ءبىرى سانالادى.

تاياۋ ارادا ۇكىمەت اسكەرى بۇل ايماققا اياق باساتىنى بەلگىلى. وسىلايشا داماسك سودىرلاردان ءبىرجولاتا قۇتىلماق نيەتتە. ءوز كەزەگىندە انكارا شەكارانىڭ بۇل تۇسىن بوسقىنداردان قورعاۋ ءۇشىن قاجەتتى شارالار قولدانىپ جاتىر. سوندىقتان شەكاراعا تاعى دا قوسىمشا تانكىلەر قويىلماق.

 بۇدان بولەك تۇركيا بيلىگى بوسقىندارعا ارنالعان اتمە لاگەرىنىڭ اۋماعىن كەڭەيتىپ، شەكارا بويىنداعى باقىلاۋ بەكەتتەرىن كۇشەيتتى. ب ۇ ۇ مالىمەتىنە سايكەس، بوسقىنداردىڭ سانى 700 مىڭنان اسۋى مۇمكىن.

 ەسكە سالساق، تۇركيا، رەسەي مەن يران ەلدەرىنىڭ باسشىلارى 7 - قىركۇيەك كۇنى تەگەراندا كەزدەسەدى. باسقوسۋدا سيرياداعى جاعدايدى قالىپقا كەلتىرۋگە قاتىستى بىرلەسكەن ءىس- ارەكەتتەر تالقىلانادى دەپ كۇتىلەدى.

www.24.kz