مەديتسينالىق ۋنيۆەرسيتەتتەردەگى ستۋدەنتتەردىڭ ءبىلىمىن تاۋەلسىز ساراپتاما انىقتايدى

استانا. قازاقپارات - قازاقستانداعى مەديتسينالىق ۋنيۆەرسيتەتتەردىڭ ستۋدەنتتەرى بۇدان بىلاي «سىرتقى ساراپتامادان» وتەتىن بولدى. وسى سىننان ءوتۋى- وتپەۋىنە بايلانىستى ستۋدەنتتەردىڭ وقۋ ورنىنداعى تاعدىرى شەشىلمەك. بۇل تۋرالى و ك ق- دا وتكەن باسپا ءسوز ءماسليحاتىندا دەنساۋلىق ساقتاۋ ءمينيسترى ەلجان ءبىرتانوۆ ءمالىم ەتتى، دەپ حابارلايدى قازاقپارات ءتىلشىسى.

«قازىرگى كۇنى ءبىزدىڭ دەنساۋلىق ساقتاۋ سالاسىنداعى ەڭ كۇردەلى ماسەلەلەردىڭ ءبىرى - مەديتسينالىق قىزمەتتەردىڭ ساپاسى. جاقىندا عانا ەلباسى ۇكىمەت باسشىسىنا وسىعان بايلانىستى تاپسىرما بەرگەن بولاتىن. وسىعان ارنايى ۇكىمەت تاراپى، دەنساۋلىق ساقتاۋ مينيسترلىگى قاجەتتى جۇمىستى اتقارىپ، بىرنەشە شارالاردى ۇسىنىپ جاتىرمىز. جاقىندا عانا ۇكىمەت وتىرىسىندا ءبىز العاشقى مەديتسينالىق كومەكتىڭ دەڭگەيىندە امبۋلاتوريالىق ۇيىمدارداعى حالىققا بەرىلگەن مەديتسينالىق قىزمەتتەردىڭ ساپاسىن كوتەرۋ جانە قولجەتىمدى ەتۋ تۋرالى شارالاردى ەنگىزدىك»، - دەيدى ەلجان ءبىرتانوۆ و ك ق- دا وتكەن باسپا ءسوز ءماسليحاتىندا.

ونىڭ ايتۋىنشا، ءبىرىنشى ماسەلە - دارىگەرلەردىڭ جانە مەيىربيكەلەردىڭ ءبىلىمى مەن تاجىريبەسى.

«قازىرگى تاڭدا بىرىنشىدەن مەديتسينالىق ءبىلىم بەرۋ ۇيىمدارىنداعى ستاندارتتار وزگەرتىلىپ جاتىر. وتكەن جىلدان باستاپ حالىقارالىق ارىپتەستەردى شاقىرىپ، ولارمەن قارىم- قاتىناستى جولعا قويدىق. بۇگىنگى تاڭدا بۇكىل مەديتسينالىق ءبىلىم بەرۋ ۇيىمدارىندا، ۋنيۆەرسيتەتتەردە جاڭا باعدارلاماعا كوشتىك. وتكەن جىلى كۋرستان كۋرسقا وتەتىن JPI دەڭگەيىن كوتەردىك. سونىمەن قازىرگى تاڭدا ستۋدەنتتەردىڭ جاۋاپكەرشىلىگى ارتتىرىپ، ءبىلىم بەرۋ ساپاسىن ارتتىرۋ ءۇشىن وسىنداي قادام جاسالدى»، - دەيدى مينيستر.

ەلجان ءبىرتانوۆ سونىمەن قاتار، وسى جىلدان باستاپ «سىرتقى ساراپتاما» جۇيەسى ەنگىزىلگەنىن اتاپ ءوتتى.

«وسىعان دەيىن مەديتسينالىق ۋنيۆەرسيتەتتەردە ستۋدەنتەردىڭ ءبىلىمىن سول وقۋ ورنىنداعى مۇعالىمدەر باعالايتىن. قازىرگى تاڭدا پيلوت تۇرىندە «سىرتقى ساراپتاما» جۇيەسىن وتكىزىپ جاتىرمىز. ول ءۇشىن ارنايى مينيسترلىكتىڭ دەڭگەيىندە ورتالىق قۇرىلعان. ءبىز قازىرگى ماجىلىسكە ەنگىزگەن زاڭ جوباسىنىڭ تارابىندا وسىنداي جاڭا باعىت اشىلادى. جىلدان جىلعا مىندەتتى تۇردە بۇكىل ستۋدەنتتەر تەك ۋنيۆەرسيتەتتەردە عانا ەمەس، مەديتسينالىق كوللەدجدەردە جانە رەزيدەنتتەر ينتەرناتۋرادا وقىعان دارىگەرلەر جالپى دارىگەرلىك بىلىممەن قاتار، سىرتقى تاۋەلسىز ساراپتامادان وتەدى. وسى ساراپتامانىڭ قورىتىندىسىنا قاراي ستۋدەنتتەردىڭ ارى قاراي وقۋدى جالعاستىرا ما، جوق پا شەشىم قابىلدايمىز»، - دەپ ءتۇيدى ەلجان ءبىرتانوۆ.

فوتو: news.kaznmu.kz

اۆتور: ايان بەكەن ۇلى