استانانى نوسەر سۋىنان قورعاۋ قالاي ىسكە اسىرىلماق

استانا. قازاقپارات - استانا بيلىگى نوسەر سۋى اعاتىن كارىز جۇيەلەرىنىڭ جۇمىسىن جاقسارتۋ ماقساتىندا جەلىلەر مەن تازالاۋ قوندىرعىلارىن جوندەۋ، قايتا قۇرۋ فۋنكتسيالارىن ءبىرىڭعاي كومپانيا - «استانا تازالىق» ج ش س- عا بەرۋدى كوزدەپ وتىر.

بۇل تۋرالى ەلوردا اكىمدىگىنىڭ رەسمي سايتىنا ءمالىم ەتىلدى، دەپ حابارلايدى قازاقپارات.

اتاپ وتىلگەندەي، بۇل تەحنيكالىق شەشىم بولعاندىقتان، جاڭا كومپانيانى قۇرۋ قاراستىرىلمايدى.

ەسكە سالا كەتەيىك، 22- تامىز كۇنى ۇكىمەت وتىرىسىندا استانانىڭ كارىز جۇيەسىنىڭ جۇمىسىن جاقسارتۋ ماسەلەسى تالقىلانعان بولاتىن. وتىرىستا «استانا تازالىق» جاۋاپكەرشىلىگى شەكتەۋلى سەرىكتەستىگىن جەكەشەلەندىرۋ باعدارلاماسىنان شىعارىپ، وعان سۋ اعاتىن ناۋالارعا قىزمەت كورسەتۋ ۋاكىلەتتىكتەرىن بەرۋ ۇسىنىلدى. ماسەلە «استانا تازالىق» ج ش س- عا قوسىمشا فۋنكتسيالاردى بەرۋدە بولىپ وتىر.

ايتا كەتۋ كەرەك، بۇگىنگى تاڭدا كارىز جۇيەسىنە قىزمەت كورسەتۋ فۋنكتسيالارى اۋداندار اكىمدىكتەرىنە جۇكتەلگەن جانە ونىمەن جەكەمەنشىك كومپانيالار اينالىسادى. ساراپشىلاردىڭ باعالاۋى بويىنشا، وسى فۋنكتسيالاردىڭ بارلىعىن ءبىر ۇيىمعا بەرۋ تەحنيكالىق جاعىنان جۇمىستاردى جەڭىلدەتەدى. مۇنداي تاجىريبە پاريج، بەرلين، ۆارشاۆا، نيۋ-يورك، ماسكەۋ سياقتى ءىرى قالالاردا قولدانىلادى.

اكىمدىكتىڭ دەرەكتەرىنە سۇيەنسەك، قازىرگى كەزدە قالانىڭ يەلىگىندە 300 كيلومەتر قۇبىر، باقىلاۋ جۇرگىزەتىن جانە جاڭبىر سۋىن قابىلدايتىن 20 مىڭعا جۋىق قۇدىق، 13 تازالاۋ قوندىرعىلارى، 3 جيناۋ توعانى، 56 درەناج جانە سۋ ايدايتىن ناسوس ستانسىلارى، 45 كيلومەترلىك ارىق جۇيەسى بار. سوڭعى ەكى جىلدا تازالاۋ قوندىرعىلارىنىڭ سانى 5 تەن 12 گە جەتىپ، ال سۋ جينالاتىن الاڭ 6,3 مىڭ گەكتارعا ۇلعايعان.