الەمنىڭ ۇزدىك بالۋاندارى ەلورداعا جينالادى
بايراقتى باسەكەگە 21 ەلدەن 800 دەن استام سپورتشى قاتىسادى. چەمپيوناتقا برازيليا، فيليپپين، رەسەي، ليتۆا، پاناما، يسپانيا، يزرايل، فرانسيا، يتاليا، ينديا، ۋكراينا، ۆەنگريا، جاپونيا، پولشا جانە گرەپپلينگتىڭ تاريحي وتانى - ا ق ش- تا تىركەلىپ ۇلگەردى.
تۋرنير قارساڭىندا، قازاقستان رەسپۋبليكاسىنىڭ مادەنيەت جانە سپورت مينيسترلىگى الاڭىندا پرەسس-كونفەرەنسيا ۇيىمداستىرىلدى. باسپا ءسوز جيىن سپيكەرلەرى: ازيالىق گرەپپلينگ كوميتەتىنىڭ پرەزيدەنتى قانات الين، دۇنيەجۇزىلىك گرەپپلينگ كوميتەتىنىڭ پرەزيدەنتى ريزۆان بوچكايەۆ جانە UWW دۇنيەجۇزىلىك گرەپپلينگ قاۋىمداستىعىنىڭ باس حاتشىسى ۆيتو پاۋليو.
قاۋىمداستىق باسشىسى: «ءبىزدىڭ جاس سپورتشىلارىمىزدا كۇشتەرىن الەمنىڭ كىل مىقتىلارىمەن سىناۋعا تاماشا مۇمكىندىك پايدا بولدى. قازاقستان نامىسىن جاقىندا وتكەن «QAZAQ BATYRY CHAMPIONSHIP» رەسپۋبليكالىق جارىسىنىڭ جەڭىمپازدارى قورعايدى. پالۋاندارىمىزدان ارينە جەڭىس كۇتەمىز. بيىل ازيادا ءبىز كوشباسشى اتاندىق. كەلەسى كەزەكتە «الەمدى» باعىندىرۋ ماقساتى تۇر»، - دەپ اتاپ ءوتتى.
باسپا ءسوز كونفەرەنتسيا بارىسىندا سپورتتىق جارىستىڭ سيمۆولى تانىستىرىلدى. گرەپپلينگ قاۋىمداستىعى چەمپيوناتتىڭ تۇمارى مەن العاشقى حالىقارالىق سپورتتىق-اناليتيكالىق جۋرنالىنىڭ تۇساۋكەسەرىن وتكىزدى.
تاريحي شايقاستا باتىرلارىمىزدى «بۇركىت» رۋحتاندىراتىن بولادى. بۇركىت - ەركىندىك پەن ەرلىكتىڭ بەلگىسى. چەمپيوناتتىڭ سيمۆولى جايلى جاقىندا جارىققا شىققان «QAZAQ BATYRY» حالىقارالىق جۋرنالىنىڭ بەتتەرىنەن وقي الاسىزدار. اۆتورلار العاشقى شىعارىلىمىن «الەم چەمپيوناتىنىڭ» دايىندىعىنا ارنادى.
ەستەرىڭىزگە سالا كەتەيىك، گرەپپلينگتەن الەم چەمپيوناتى 6-9- قىركۇيەك ارالىعىندا استانا قالاسى «داۋلەت» سپورت كەشەنىندە وتەدى.
