دۇنيەجۇزىلىك كوشپەندىلەر ويىندارى: قازاقستان ەكى ورىن ارتقا شەگىنىپ قالدى
ايتا كەتسەك، كوشپەندىلەر ويىندارىنىڭ العاشقى كۇنى قازاقستان 7 التىن، 7 كۇمىس، 5 قولا مەدالمەن سايىسقا قاتىسۋشى مەملەكەتتەردىڭ ءبارىن ارتتا قالدىرعان بولاتىن.
ەكىنشى كۇنگى دە قازاقستان قۇراماسىنىڭ جەتىستىگى كوڭىل قۋانتارلىق. ناقتىراق ايتقاندا، بۇگىن قازاقستاندىق سپورتشىلار ءتۇرلى دارەجەدەگى 13 مەدال يەلەندى، ونىڭ 2-ەۋى التىن، 2-ەۋى كۇمىس، 9-ى قولا. قازاق كۇرەسىنەن ەكى سپورتشىمىز - ءابىلقايىر ماۋلەنين (70 ك گ دەيىن) مەن ەرسۇلتان مۇزافاروۆ (90 ك گ دەيىن) فينالعا شىعىپ، ەكى التىن مەدال يەلەندى. نۇرداۋلەت جارىلعاپوۆ قولا مەدال ەنشىلەدى. ال ارقان تارتىستا ءبىزدىڭ سپورتشىلار كوماندالىق سايىستا قولا مەدال ەنشىلەدى. جەكە تارتىستا كوماندا كاپيتانى قايراتحان شونگۋ كۇمىس مەدال الدى.
ماس-رەستلينگتە سپورتشىلارىمىز 5 مەدال يەلەندى (4 قولا، 1 كۇمىس). مەدەت ەسبولايەۆ (60 ك گ)، تەمىرلان شامەت (70 ك گ) ، ۆياچەسلاۆ ستاركوۆ (105 ك گ)، الەكساندر كراسنوۆ (125 ك گ)، داريا نەستەروۆا كۇمىس مەدال الدى (85 ك گ). ال بۇركىتشى سەرىكبەك كۇنتۋعان ۇلى بۇركىت سالۋدا ءۇشىنشى ورىننان كورىندى. تۇركىمەن كۇرەسىنەن (بەلبەۋ كۇرەستە) ءبىزدىڭ ەكى سپورتشى ادىلەت شالعىنبەك ۇلى (62 ك گ) جانە ابسوليۋتتى سالماقتا اماندىق ابىلاي قولا مەدال يەلەندى.
سونىمەن جالپى بۇگىنگى جارىس قورىتىندىسى بويىنشا، العاشقى ورىنداردا جارىس قوجايىندارى قىرعىزستان، ودان كەيىن رەسەي كوماندالارى جايعاسقان. ال العاشقى ۇشتىكتى قازاقستان تۇيىندەپ تۇر.
