الماتىدا بالالار مەن جاس وسپىرىمدەرگە گولف ويناۋدى تەگىن ۇيرەتىپ جاتىر
ساباقتاردى ءبىرىنشى قازاقستاندىق گولف-كلۋب «نۇرتاۋ» اكادەمياسىنىڭ كاسىپقوي باپكەرلەرى وتكىزۋدە.
تەگىن ساباققا قاتىسۋ ءۇشىن تەك «نۇرتاۋ» كلۋبىنا كەلىپ، ساۋالناما تولتىرۋ قاجەت. ال ودان كەيىن، قاتىسۋشى وزىنە بەرىلگەن كۇنى ءوز توبىمەن بىرگە اپتاسىنا ەكى رەت، ءبىر ساعاتتان جاتتىعۋ وتكىزەدى (ءبىر ادامعا بارلىعى 8 ساباق).
گولف ويناۋدى ۇيرەتۋ ساباقتارى كۇن سايىن دۇيسەنبىدەن جۇماعا دەيىن وتكىزىلەدى. جاتتىعۋلار تاڭعى ساعات 8:45 تەن باستالىپ، ارتىنشا كەلەسى توپتار ءوز ۋاقىتىمەن جاتتىعۋلارىن باستايدى: 10:00، 14:30، 15:45 جانە 17:00 دە.
«بارلىق ساباقتار اقىسىز تۇردە وتكىزىلەدى. ءبىز بارلىعىن كەرەكتى جابدىقتارمەن ءوزىمىز قامتاماسىز ەتەمىز. ءبىزدىڭ وقۋ باعدارلامامىز 4 كەزەڭنەن تۇرادى: ولار الىسقا جانە جاقىن جەرگە سوققىلار جاساپ ۇيرەنەدى، سودان كەيىن تەوريالىق ساباقتار جانە پات بولادى. ارتىنشا بارلىعى چەمپيوناتقا قاتىسىپ، تەست تاپسىرادى»، - دەپ اتاپ ءوتتى «نۇرتاۋ» بالالار اكادەمياسىنىڭ باس باپكەرى الەكساندر ۆونگاي.
ونىڭ ايتۋىنشا، بىلتىرعىدان قازىرگى ۋاقىتقا دەيىن گولف ويناۋدى 800 دەن استام ادام ۇيرەنگەن، جوسپار بويىنشا ءالى 300 ادامدى وقىتۋ قاجەت. قازىر ءار توپتا 13-15 بالادان جاتتىعادى. بۇل باعدارلاما اياسىندا ءاربىر جەتكىنشەك تەك گولف ادىستەرىن مەڭگەرىپ عانا قويماي، درەسس-كود ەرەجەلەرىن قاتاڭ تۇردە ساقتاۋ، سونداي-اق، ءتارتىپتى بولۋدى ۇيرەنەدى.
ايتا كەتەر جايت، باعدارلامانىڭ باستى ماقساتى وسى سپورت ءتۇرىن ەلىمىزدە دامىتىپ، جاستار اراسىندا ءناسيحاتتاۋ بولىپ تابىلادى. تەگىن وقىتۋ ساباقتارى وسى جىلدىڭ قاراشا ايىنا دەيىن جالعاسادى. باعدارلاما تۋرالى تولىق اقپاراتتى Nurtau.kz سايتىنان، بالالار اكادەمياسى بولىمىنەن كورە الاسىزدار.
