ۇلى بريتانيادا شەتەلدىك ستۋدەنتتەر ءۇشىن ۆيزالىق تالاپتاردى جەڭىلدەتۋ ۇسىنىلدى

بريۋسسەل. قازاقپارات -  ۇلى بريتانيا ۋنيۆەرسيتەتتەرى شەتەلدىك ستۋدەنتتەردىڭ وقۋدى اياقتاعاننان كەيىن ەكى جىل بويى قالىپ، جۇمىس ىستەۋىنە مۇمكىندىك بەرەتىن ۆيزالىق جۇيەگە وزگەرىستەر ەنگىزۋگە شاقىردى.

بۇل تۋرالى قازىرگى تاڭدا انگليانىڭ شەففيلد قالاسىندا ءوتىپ جاتقان  ۇلىبريتانيا ۋنيۆەرسيتەتتەرىنىڭ جىل سايىنعى كونفەرەنتسياسىندا ايتىلدى، دەپ حابارلايدى قازاقپاراتتىڭ مەنشىكتى ءتىلشىسى.

بريتانيا ۇكىمەتى 2012 -جىلى ەو قۇرامىنا كىرمەيتىن ەلدەردىڭ ستۋدەنتتەرىنە وقۋ اياقتالعاننان كەيىن ەلدە قالىپ جۇمىس ىستەۋ ءۇشىن ۆيزا بەرۋدەن باس تارتقان ەدى. ۋنيۆەرسيتەت قاۋىمداستىعىنىڭ پايىمداۋىنشا، بۇل ەرەجە ەلدىڭ الەۋەتتى ۇمىتكەرلەردى تاڭداۋىنا كەدەرگى كەلتىرۋدە.

2011 -جىلدان باستاپ ستۋدەنتتىك ۆيزا ەنگىزگەن اۋستراليا، كانادا جانە ا ق ش- تاعى جوعارى وقۋ ورىندارىنا شەتەلدىكتەر تاراپىنان سۇرانىس ارتقانى اتاپ ءوتىلدى. ال، ۇلىبريتانيادا تىركەلگەن ستۋدەنتتەردىڭ جالپى سانى سول دەڭگەيدە قالىپ قويعان.

ا ق ش پەن كانادا شەتەلدىك تۇلەكتەرگە ۋنيۆەرسيتەت ءتامامداعاننان كەيىن ءۇش جىلعا دەيىن، ال اۋستراليا - ءتورت جىلعا دەيىن قالىپ، جۇمىس ىستەۋلەرىنە مۇمكىندىك جاساپ وتىر.

 ۋنيۆەرسيتەتتەردىڭ ايتۋىنشا،  ۇلىبريتانيا شەتەلدىك ستۋدەنتتەرگە ءبىلىم وشاقتارىن بىتىرگەننەن كەيىن ەكى جىلعا دەيىن قالىپ، جۇمىس ىستەۋگە رۇقسات بەرۋ ارقىلى وقۋ ءۇشىن تارتىمدى ورىن بولماق. ال، بۇل باسقا دا تانىمال باعىتتاردا باسەكەلەسۋگە مۇمكىندىك بەرەدى.