وزبەكستاندىقتار سەمەيدە اباي قۇنانباي ۇلى تۋرالى فيلم تۇسىرۋدە
يگى باستاما وزبەكستان پرەزيدەنتى شاۆكات ميرزيەيەۆتىڭ قازاق اقىنى اباي قۇنانباي ۇلىنىڭ شىعارماشىلىق مۇراسىن ناسيحاتتاۋ تۋرالى قاۋلىسى اياسىندا جۇزەگە اسىپ وتىر. وزبەكستان ەلىنىڭ باسشىسى ش. ميرزيەيەۆ بەكىتكەن قۇجاتتا ۇلى اقىن جانە ويشىل اباي قۇنانباي ۇلىنىڭ ەسىمى مەن مول شىعارماشىلىق مۇراسى قازاق حالقىنىڭ عانا ەمەس، بارشا تۇركى حالىقتارىنىڭ، ونىڭ ىشىندە وزبەك حالقىنىڭ رۋحاني دامۋ تاريحىندا وشپەس ءىز قالدىرعانى ايتىلعان.
وزبەك تىلىندەگى «اباي ءسوزى» دەرەكتى فيلمنىڭ ماقساتى - كورەرمەندەردى ابايدىڭ بالالىق شاعى، وسكەن ورتاسى، شىعارماشىلىعى جانە مۇراعات قۇجاتتارىمەن جاقىن تانىستىرۋ.
تاشكەنت قالاسىنداعى دەرەكتى فيلمدەر ستۋدياسىنىڭ ۇجىمى ابايدىڭ سەمەيدەگى مۋزەيىنە كەلىپ، اقىنعا قاتىستى قۇندى دەرەكتەرمەن تانىستى. سونداي-اق فيلم اۆتورلارى مۋزەيگە اقىننىڭ وزبەك تىلىنە اۋدارىلعان شىعارمالار جيناعىن جانە «اباي جولى» رومان-ەپپوپەياسىن تارتۋ ەتتى.
«ستۋديا ۇجىمى 5 كۇن بويى سەمەيدەگى جانە جيدەبايداعى اقىن مۋزەيىندە بولىپ، ابايدىڭ ءومىر جولى، شىعارماشىلىعى تۋرالى ءتۇسىردى. فيلم وسى جىلدىڭ سوڭىندا شىعادى دەپ جوسپارلانۋدا»، - دەدى ابايدىڭ «جيدەباي-ءبورىلى» قورىق-مۋزەيىنىڭ عىلىمي قىزمەتكەرى قۋات قيىقباي.
