الماتىدا جوعارى تەحنولوگيالى قوقىس سۇرىپتايتىن كەشەن ىسكە قوسىلدى
سونىڭ ارقاسىندا پوليگوندا تەك قانا ينەرتتى قاۋىپسىز جانە بيوىدىرايتىن ماتەريالدار كومىلەتىن بولادى، دەپ حابارلايدى قازاقپارات.
قالا اكىمدىگىنىڭ سايتىنىڭ مالىمەتىنشە، كاسىپورىندا قايتا وڭدەۋ ءۇشىن 50 مىڭ تونناعا دەيىن كارتون، تسەللوفان، اينەك، پلاستيكا، مەتالل سياقتى زاتتار سۇرىپتالادى. بولاشاقتا كەشەن جانىنان شيكىزاتتاردى ەكىنشى قايتارا تەرەڭ وڭدەۋ ءۇشىن قوسىمشا قۋاتتاردى جاساۋ جوسپارلانعان. وسىنىڭ بارلىعى جانە قالدىقتاردى وڭدەۋدى باسقارۋدىڭ كەشەندى جۇيەسىن ەنگىزۋ قالانى قورشاعان ورتاعا تۇسەتىن ەكولوگيالىق جۇكتەمەنى ازايتۋعا ويداعىداي ىقپال ەتەدى.
مەگاپوليس اكىمى باۋىرجان بايبەك مۇنداي ماڭىزدى كەشەندى ىسكە قوسۋ تەك قالا ءۇشىن عانا ەمەس، جالپى ەلىمىز ءۇشىن ەلەۋلى وقيعا ەكەنىن اتاپ ءوتتى.
«مەملەكەت باسشىسى جاڭا تەحنولوگيالاردى ەنگىزە وتىرىپ كاسىپورىنداردىڭ تيىمدىلىگىن عانا ەمەس، سونىمەن قاتار ەكولوگيالىق جاعدايىن جاقسارتۋ قاجەتتىگىن تۇراقتى نازاردا ۇستاۋدا جانە ەلىمىزدە قابىلدانعان سيفرلاندىرۋ باعدارلاماسى دا وسى باعىتتا جۇزەگە اسۋدا. بۇل كەشەن-وزىق تەحنولوگيانىڭ ۇلگىسى ءارى 2017 -جىلعى ەكسپونىڭ نەگىزگى مۇرالارىنىڭ ءبىرى. جوبا مەملەكەتتىك- جەكەشەلىك ارىپتەستىك قاعيدا بويىنشا قولعا الىنعان، 5,4 ميلليارد تەڭگەگە ينۆەستورمەن 25 جىلعا كەلىسىم جاسالدى، ال قالا ءوز كەزەگىندە جەر ءبولىپ، بارلىق ينجەنەرلىك كوممۋنيكاتسيالاردى جۇرگىزدى»، - دەپ اتاپ ءوتتى باۋىرجان بايبەك.
3,9 گەكتار اۋماققا اكىمشىلىك بلوك، ۇلى بريتانيادا جاسالعان ارنايى تەحنيكانىڭ گاراجى جانە وزىق يتالياندىق قوندىرعىلارمەن جابدىقتالعان نەگىزگى وڭدەۋ بولمەلەرى ورنالاسقان. كاسىپورىندى ىسكە قوسۋ بارىسىندا 530 تۇراقتى جۇمىس ورنى پايدا بولدى.
«ءتارتىپ» ا ق-نىڭ باسقارما ءتوراعاسى ايبەك راحيموۆ قالا اكىمشىلىگى مەن جەكە ينۆەستورلار كونسورتسيۋمى اراسىندا ۇزاق مەرزىمگە جاسالعان كەلىسىم كاسىپورىننىڭ بارىنشا ءتيىمدى جۇمىس اتقاراتىنىنىڭ وزىق مودەلى بولاتىندىعىن ايتتى.
قازىرگى كەزدە «ءتارتىپ» ا ق ت ق ق- دىڭ %70 ىن قامتيدى. كومپانيادا 236 تەحنيكا بار، قوقىس تاسىمالدايتىن بارلىق كولىكتەردە GPS جۇيەسى جۇمىس ىستەيدى، پلانشەتتەر ارقىلى قوقىس الاڭىنداعى جاعدايلار تۇگەل كورىنەدى. ۇزاق مەرزىمدى كەلىسىمنىڭ نەگىزگى تارماقتارىنىڭ ءبىرى اۆتوپاركتى ۇنەمى جاڭارتۋ جانە جۇمىس پروتسەسسىن اۆتوماتتاندىرۋ بولىپ تابىلادى. قازىردىڭ وزىندە ەۋرو-4 ستاندارتىنىڭ 30 ماشيناسى ساتىپ الىندى جانە باعىتتاردى ديسپەتچەرلەۋ جۇيەسى ەنگىزىلدى.
