ەلوردادا شەتەلدە تۇراتىن قازاقستاندىق سۋرەتشىلەردىڭ كورمەسى وتەدى
«Astana Art Show» - قازاقستانداعى قازىرگى زامانعى بەينەلەۋ ونەرىنىڭ حالىقارالىق بيەننالە ىسپەتتەس نەگىزگى شاراسى. كورمەگە جۇمىستارى ءساتتى دەپ تابىلعان جانە شەتەلدە تانىمال بولعان قازاقستاندىق جاس سۋرەتشىلەر قاتىسادى.
بيەننالە اياسىندا جاس سۋرەتشىلەر بايقاۋى، تانىمال سۋرەتشىلەردىڭ اشىق دارىستەرى مەن شەبەرلىك-ساباقتارى وتەدى.
سونىمەن قاتار، حالىقارالىق ءىرى كورمەلەرگە قاتىسقان 20 دان استام قاتىسۋشى ءوز جۇمىستارى مەن ارنايى قۇرىلعان شوۋ باعدارلامالارىن ۇسىنادى.
ودان بولەك، كەلۋشىلەر «TSE Art Destination» گالەرەياسىندا سۋرەتتەر مەن ينستاللياتسيالاردى تاماشالاي الادى.
كورمەگە قاتىسۋشىلار اراسىندا تانىمال زامانۋي ونەر شەبەرى، بەلگىلى «مەن وبلوموۆ» اۆتوپورترەتىنىڭ اۆتورى، جاپوندىق فوتوگراف يكۋرۋ كۋۆادجيما بار.
سونداي-اق، لوندوندا تانىمال بولعان قازاقستاندىق سۋرەتشى ازا شادەنوۆا ەلوردانىڭ كوركەمونەر اۋەسقويلارىنىڭ نازارىنا ءوز جۇمىسىن ۇسىناتىن بولادى. ال جاس سۋرەتشى ءادىل اۋباكىروۆ استانا تۇرعىندارى مەن قوناقتارىن قالا عيماراتتارىنىڭ ءبىرىنىڭ قاسبەتىندە سالىناتىن اۆتورلىق جاڭا ارت-نىسانىمەن قۋانتاتىن بولادى.
«Astana Art Show» كورمەسىنىڭ سالتاناتتى اشىلۋىنا ارنايى قوناق رەتىندە الەمدىك دەڭگەيدەگى بەلگىلى اۋستريالىق مۋزىكانت بەندجامين سكەپپەر قاتىسادى.
ايتا كەتەيىك، بيەننالە - ەكى جىلدا ءبىر وتەتىن كوركەمونەر كورمەسى، فەستيۆالى نە بولماسا شىعارماشىلىق بايقاۋ.
