21:02, 03 - قىركۇيەك 2018 | GMT +5
جەتىنشى قاباتتان قۇلاعان ءبىر جاسار ءسابي امان قالدى
مينسك. قازاقپارات - بەلارۋستىڭ موگيليەۆ قالاسىندا 2 - قىركۇيەك كۇنى كەشكىسىن تۇرعىن ۇيلەردىڭ ءبىرىنىڭ جەتىنشى قاباتىنان قۇلاپ كەتكەن ءبىر جاسار بالا امان قالدى.
بۇل تۋرالى «قازاقپارات» ح ا ا بەلتا اگەنتتىگىنە سىلتەمە جاساپ حابارلايدى.
تەرگەۋ كوميتەتىنىڭ موگيليەۆ وبلىسى بويىنشا باسقارماسىنىڭ رەسمي وكىلى وكسانا سولەنيۋكتىڭ مالىمدەۋىنشە، 17:15 شاماسىندا سابيىمەن بىرگە سەرۋەندەپ قايتقان ايەل ونى ديۆانعا جاتقىزىپ، ءوزى اسۇيگە كەتەدى. بالا سول كەزدە تەرەزەدەن قۇلاپ كەتكەن.
وقىس جاعدايعا كۋا بولعان كورشى ايەل قولما- قول جەدەل جاردەم شاقىرادى. بالا بىرنەشە جەرىنەن جاراقات العانىنا قاراماستان، امان قالعان. ول وبلىستىق بالالار اۋرۋحاناسىنىڭ جانساقتاۋ بولىمىنە جەتكىزىلدى.
