ەلباسى قازاقستاننىڭ تۇركى كەڭەسىندەگى ءتوراعالىعىن قورىتىندىلادى
«قازاقستاننىڭ ءتوراعالىعى كەزىندە تۇركى مەملەكەتتەرىنىڭ ينتەگراتسياسى ءوز جالعاسىن تاپتى. اتاپ ايتقاندا، استانادا وتكەن سامميتتە تۇركى تىلدەس ەلدەرى ينتەگراتسياسىنىڭ تۇجىرىمداماسىن ازىرلەۋ تاپسىرىلعان بولاتىن. ول قۇجات دايىن بولدى. وندا ينتەگراتسيانىڭ ماقساتتارى مەن قاعيداتتارى، دامۋ كەزەڭدەرى مەن ىسكە اسىرۋ جولدارى ايقىندالدى. سونداي- اق، باسەكەگە قابىلەتتى ۇلتتىق ەكونوميكانى قۇرۋعا، مادەني- گۋمانيتارلىق بايلانىستارىمىزدى تەرەڭدەتۋگە ىقىلاس تانىتتىق. ءبىلىم، اقپاراتتىق تەحنولوگيالار، ەنەرگەتيكا، كولىك- ترانزيت، قارجى سالالارىندا ىنتىماقتاستىقتى كەڭەيتۋگە ەرەكشە نازار اۋدارىلدى»، - دەدى ن. نازاربايەۆ.
پرەزيدەنتتىڭ ايتۋىنشا، قازاقستاننىڭ ءتوراعالىعى كەزىندە عىلىمي- اعارتۋشىلىق جۇمىستارعا دا ەرەكشە كوڭىل ءبولىندى. ماسەلەن، ورتاق تۇركى تاريحىنا ارنالعان وقۋلىق ازىرلەندى.
«اتالعان وقۋلىقتىڭ ەلدەرىمىزدىڭ مەكتەپ باعدارلاماسىنا ەنگىزىلە باستاعانى قۋانىشتى جايت دەپ ساناۋ قاجەت. بۇل جاستاردى ورتاق تاريحي- مادەني مۇرالاردىڭ نەگىزىندە تاربيەلەۋدىڭ ءتيىمدى تەتىگى بولادى دەپ سەنەمىن. سونىمەن قاتار، تۇركى اكادەمياسى تاريحىمىزدى تانىتىپ، سانانى جاڭعىرتۋعا باعىتتالعان 90-نان استام كىتاپ شىعاردى. 4 مىڭ جىلدىق مادەني- مۇرامىزدى جيناقتاپ، ونى جاريالاۋعا ارنالعان «اتالار ميراسى» پورتالى ىسكە قوسىلدى. تۋىسقان ەلدەردىڭ تىرشىلىك تامىرىن باسىپ وتىراتىن «تۇركى بارومەترى» الەۋمەتتىك- زەرتتەۋ جوباسى ىسكە اسىرىلا باستادى»، - دەپ اتاپ كورسەتتى مەملەكەت باسشىسى.
بۇدان بولەك، تۋريزم سالاسىن جانداندىرۋ ماقساتىندا «زاماناۋي ۇلى جىبەك جولى» اتتى جوبا ىسكە قوسىلدى. اتالعان جوبا اسىندا ۇلى جىبەك جولىندا ورنالاسقان ەلدەردىڭ كيەلى ورىندارىن 14 كۇندە ارالاپ شىعۋعا بولادى.
«ءبىز بۇنىڭ بارلىعىن تۇركى ينتەگراتسياسىنىڭ تولايىم تابىستارى رەتىندە باعالايمىز. 2015 -جىلى استانادا وتكەن V سامميتىمىزدەن بەرى تۇركى تىلدەس حالىقتارىنىڭ ساياسي بايلانىسى نىعايا ءتۇستى. ماسەلەن، وسى ۋاقىت ىشىندە تۇركى كەڭەسىنىڭ مەملەكەت باسشىلارى ەكىجاقتى كەزدەسۋلەر وتكىزىپ، ءوزارا ساپار الماستى. اتالعان ءۇردىس ەلدەر اراسىنداعى ساۋدا- ەكونوميكالىق جانە الەۋمەتتىك قاتىناستاردىڭ كەڭەيۋىنە مۇمكىندىك بەردى. اتاپ ايتقاندا، تۇركى كەڭەسى مەملەكەتتەرى اراسىنداعى ساۋدا- اينالىمى ارتتى. سونىمەن قاتار، كونە تۇركى ينتەگراتسياسى ءۇشىن ماڭىزى زور ورتالىق ازيا مەملەكەتتەرى ىنتىماقتاستىعىنىڭ جاڭا بەلەسكە كوتەرىلگەنىن اتاپ وتكىم كەلەدى. بيىل ناۋرىزدا ورتالىق ازيا مەملەكەتتەرى باسشىلارىنىڭ استانادا وتكەن كەزدەسۋى سونىڭ ءبىر دالەلى. بۇنداي باسقوسۋدى ءبىز ارى قاراي جۇرگىزۋگە كەلىستىك. ەندىگى كەزدەسۋ كەلەسى جىلى ناۋرىز ايىندا تاشكەنتتە بولادى»، - دەدى ن. نازاربايەۆ.
ايتا كەتەيىك، بۇگىنگى سامميتكە قازاقستان، قىرعىزستان، تۇركيا، ازەربايجان، وزبەكستان مەن ماجارستان باسشىلارى قاتىستى. وتىرىس بارىسىندا نۇرسۇلتان نازاربايەۆ كەڭەسكە قاراستى كەيبىر ۇيىمداردى قىسقارتۋدى ۇسىندى. كەڭەس مۇشەلەرى ق ر پرەزيدەنتى نۇرسۇلتان نازاربايەۆتىڭ ۇسىنىسىن ماقۇلدادى. الداعى ۋاقىتتا «رۋحاني جاڭعىرۋدىڭ» جوبالارى تۇركى الەمىنە تارالادى. وزبەكستان ۇيىمنىڭ جۇمىسىنا قاتىسا بەرەدى. ال ماجارستانعا باقىلاۋشى مارتەبەسى بەرىلدى. سونداي- اق، كەڭەس مۇشەلەرى ماڭىزدى قۇجاتتارعا قول قويدى. ونىڭ ىشىندە تۇركى تىلدەس ەلدەردىڭ ينتەگراتسياسىنا ارنالعان تۇجىرىمداما دا بار. كەڭەستىڭ باس حاتشىسى اۋىستى. كەلەسى سامميت ازەربايجاننىڭ باكۋ قالاسىندا وتەدى.
فوتو: kabar.kz
