تۇركى كەڭەسىنىڭ كەلەسى سامميتى قايدا وتەدى
سامميت بارىسىندا قازاقستان پرەزيدەنتى ۇيىمنىڭ ءتوراعالىق مىندەتىن قىرعىزستانعا تاپسىردى.
سونداي- اق، نۇرسۇلتان نازاربايەۆ كەڭەسكە قاراستى كەيبىر ۇيىمداردى قىسقارتۋدى ۇسىندى.
ال كەڭەس مۇشەلەرى ق ر پرەزيدەنتى نۇرسۇلتان نازاربايەۆتىڭ ۇسىنىسىن ماقۇلدادى.
الداعى ۋاقىتتا «رۋحاني جاڭعىرۋدىڭ» جوبالارى تۇركى الەمىنە تارالادى.
سامميتتەن كەيىن تۇركى كەڭەسىنىڭ جاڭادان تاعايىندالعان باس حاتشىسى باعدات امىرەيەۆ وسى ۇيىمعا وزبەكستاننىڭ قوسىلۋىنا قاتىستى تۇسىنىك بەردى.
«وزبەكستان تۇركى كەڭەسىنىڭ مۇشەسى ەمەس. الايدا وزبەك ەلىنىڭ باسشىلارى كوپتەن بەرى سامميتتەردىڭ جۇمىسىنا قاتىسىپ كەلەدى. ولار تۇركى تىلدەس ەلدەردىڭ دوستىعىن، قاشاندا ءوز باۋىرلارىن قولدايدى. جاقىن ارادا وزبەكستاننىڭ تۇركى كەڭەسىندەگى مۇشەلىگى راسىمدەلەدى دەپ سەنەمىز. ول ءۇشىن بارلىق العىشارتتار بار»، - دەپ اتاپ كورسەتتى ب. امىرەيەۆ.
ونىڭ ايتۋىنشا، كەڭەسكە مۇشە مەملەكەت باسشىلارى بىرلەسكەن دەكلاراتسيانى قابىلدادى. اتالعان قۇجاتتا اتقارىلعان جۇمىسقا قورىتىندى جاسالىپ، الداعى ماقسات- مىندەتتەر ايقىندالعان.
«سونىمەن بىرگە، وسىدان ءۇش جىل بۇرىن استانادا وتكەن سوڭعى سامميتتە ەل باسشىلارى تۇركى تىلدەس مەملەكەتتەر ينتەگراتسياسىنىڭ تۇجىرىمداماسىن ازىرلەۋدى ۇسىنعان بولاتىن. سول قۇجات دايىن بولدى. بۇگىن تۇجىرىمداماعا قول قويىلدى. بۇل - وتە ماڭىزدى قۇجات. سەبەبى، تۇركى تىلدەس ەلدەردىڭ ىنتىماقتاستىعىن دامىتۋدى كوزدەيدى»، - دەدى ب. امىرەيەۆ تۇركى كەڭەسىنىڭ VI سامميتىنەن كەيىن جۋرناليستەرگە بەرگەن سۇحباتىندا.
بۇدان بولەك، بۇگىن ماجارستانعا باقىلاۋشى مارتەبەسى بەرىلدى.
تۇركى كەڭەسىنىڭ كەلەسى سامميتى ءازىربايجاننىڭ باكۋ قالاسىندا وتەدى. ايتا كەتكەن ءجون، سامميت جىل سايىن ۇيىمداستىرىلادى.
ارمان اسقاروۆ
