تۇركى كەڭەسى نۇرسۇلتان نازاربايەۆتىڭ ۇسىنىسىن قولدادى
«بۇگىنگى سامميتتە كوپتەگەن ۇسىنىستار ايتىلدى. سونىڭ ىشىندە كەڭەسكە قاراستى ۇيىمداردى وڭتايلاندىرۋ ماسەلەسى دە بار. قازاقستان پرەزيدەنتى نۇرسۇلتان نازاربايەۆ سول ۇيىمداردى رەفورمالاۋعا قاتىستى ۇسىنىس جاسادى. باسقا مەملەكەتتەردىڭ باسشىلارى وسى ۇسىنىستى قولدادى»، - دەپ اتاپ كورسەتتى تۇركىتىلدەس مەملەكەتتەردىڭ ىنتىماقتاستىعى كەڭەسىنىڭ باس حاتشىسى باعدات امىرەيەۆ تۇركى كەڭەسىنىڭ VI سامميتىنەن كەيىن جۋرناليستەرگە بەرگەن سۇحباتىندا.
ونىڭ ايتۋىنشا، كەڭەس حاتشىلىعى ۇيىمداردى وڭتايلاندىرۋعا قاتىستى باستامانى جان- جاقتى پىسىقتاپ، كەلەسى سامميتتە مەملەكەت باسشىلارىنىڭ قاراۋىنا ناقتى ۇسىنىس رەتىندە ەنگىزەتىن بولادى.
ايتا كەتەيىك، بۇگىن ىستىق كولدىڭ جاعاسىندا تۇركىتىلدەس مەملەكەتتەر ىنتىماقتاستىعى كەڭەسىنىڭ كەزەكتى ءسامميتى ءوتتى. سول جەردە مەملەكەت باسشىسى نۇرسۇلتان نازاربايەۆ تۇركى كەڭەسىن زامان تالابىنا ساي بەيىمدەپ، ۇيىم قىزمەتىن جەتىلدىرۋدى ۇسىندى.
«بۇگىنگى تاڭدا حاتشىلىقتىڭ مانداتى تەحنيكالىق جانە حاتتامالىق سۇراقتارمەن شەكتەلگەن. وعان قوسا، تۇركى ىنتىماقتاستىق ينستيتۋتتارىنىڭ قىزمەتىندە قوسارلانۋشىلىق ءجيى كەزدەسەدى. وسىعان وراي، ۇيىمنىڭ تيىمدىلىگىن، فۋنكتسيونالدىق يكەمدىلىگىن جانە ينستيتۋتتاردىڭ الەۋەتىن كۇشەيتۋ ماقساتىندا تۇركى اكادەمياسىن، «ميراس» تۇركى مادەنيەتىنىڭ قورىن، سونداي- اق اقساقالدار كەڭەسىن تۇركسوي- مەن (تۇركى مادەنيەتى مەن ونەرىن دامىتۋ حالىقارالىق ۇيىمى - اۆت. ) بىرىكتىرۋ كەرەك. بارلىعى تۇركسوي- دىڭ اياسىندا جۇمىس ىستەسىن. بىزگە كوپ شەنەۋنىكتىڭ قاجەتى جوق»، - دەدى ن. نازاربايەۆ تۇركىتىلدەس ەلدەر ىنتىماقتاستىعى كەڭەسىنىڭ VI سامميتىندە.
پرەزيدەنت تۇركى كەڭەسىنە كىرەتىن تاعى ءبىر ۇيىم - تۇركى ەلدەرىنىڭ پارلامەنتارالىق اسسامبلەياسىن (تۇرك پ ا) قىسقارتۋدى ۇسىندى. سەبەبى اتالعان ينستيتۋت ءوز مىندەتىن اتقاردى. «قازىرگى كەزدە ونىڭ قىزمەتىندە جۇيەلىلىك بايقالمايدى. سوندىقتان ۇيىمنىڭ جۇمىسىن ساراپتاۋ قاجەت. ءتيىمدى بولسا، وندا ونىڭ فۋنكتسيالارىن حاتشىلىققا بەرۋگە بولادى. ەگەر ءتيىمسىز بولسا، ونى تولىعىمەن قىسقارتۋدى ۇسىنامىن. بۇل شارالار كەڭەستىڭ جۇمىسىن ءتيىمدى وڭتايلاندىرۋعا، قىزمەتكەرلەر سانىن قىسقارتۋعا، سونداي- اق قاراجاتتى ۇنەمدەۋگە مۇمكىندىك بەرەدى»، - دەپ اتاپ كورسەتتى ن. نازاربايەۆ.
مەملەكەت باسشىنىڭ ايتۋىنشا، ۇيىمنىڭ نەگىزى ورگانى - پرەزيدەنتتەردىڭ كەزدەسۋى. ال وسى كەزدەسۋدە قابىلدانعان شەشىمدەردى حاتشىلىق ىسكە اسىرادى. حاتشىلىق ءوز كەزەگىندە تەك اكىمشىلىك جۇمىستارمەن شەكتەلمەي، ۇيىمنىڭ ينتەللەكتۋالدى وزەگىنە اينالۋى ءتيىس. «وسىلايشا، ءبىزدىڭ ۇيىم ءبىرىن- ءبىرى تولىقتىراتىن ەكى دەڭگەيدەن تۇرادى. ول - حاتشىلىق جانە مادەني- گۋمانيتارلىق سالامەن اينالىساتىن ينستيتۋت (تۇركسوي - اۆت. ). وسى ورايدا ۇيىم حاتشىلىعى بارلىق تاراپتارمەن بىرلەسە وتىرىپ، بۇكىل باستامالار مەن ۇسىنىستاردى مۇقيات پىسىقتاپ، تۇركى كەڭەسىنىڭ زامان تالابىنا ساي جاڭعىرتۋ باعدارلاماسىن ۇسىنۋى قاجەت. ارينە، بۇل ماسەلەنى تالقىلاۋ قاجەت. بۇگىن ارىپتەستەر كەلىسەتىن بولسا، قىسقاشا شەشىم قابىلداۋعا بولار ەدى. ال حاتشىلىق كەلەسى كەڭەسكە دەيىن ءبارىن تالقىلاپ، بىزگە ۇسىنىس ەنگىزە الادى»، - دەدى ن. نازاربايەۆ.
اۆتور: ارمان اسقاروۆ
