ءالى تالاي بيىكتەردى باعىندىرامىز - يليا يلين بىرنەشە جىلدىق ۇزىلىستەن كەيىن

استانا. قازاقپارات - بىرنەشە جىل ۇزىلىستەن كەيىن ءدال بۇگىن قازاقستان چەمپيوناتىندا تۇعىرعا كوتەرىلگەن الەمنىڭ ءتورت دۇركىن چەمپيونى يليا يلين جانكۇيەرلەرگە العىسىن ءبىلدىردى، دەپ حابارلايدى قازاقپارات ءتىلشىسى.

«مىنە، مەنىڭ كوپتەن كۇتكەن التىن مەدالىم. بۇگىن مەن ونى ۇتىپ الدىم. ماعان قولداۋ ءبىلدىرىپ كەلە جاتقان، ماعان ءاردايىم ساتتىلىك تىلەگەن، قاسىمدا بولعان بارلىق دوستارىما راحمەت ايتقىم كەلەدى. مەن سىزدەرگە زور العىسىمدى بىلدىرەمىن. بۇل - ءبىزدىڭ بارلىعىمىزدىڭ ورتاق جەڭىسىمىز. بۇل ءبىزدىڭ جەتىستىكتەرىمىزدىڭ باسى عانا دەپ ويلايمىن. بۇدان دا زور مەدالدار بولادى. نە ايتقىم كەلدى؟ بۇگىن مەنىڭ العاشقى ستارتىم. مەن ورالدىم. ەندى ارى قاراي جۇمىستى جالعاستىرا بەرەمىز. ارى قاراي الەم چەمپيوناتى سودان كەيىنگى ماقسات - ارينە، وليمپيادا ويىندارى. قىمباتتا دوستارىم، سىزدەردىڭ بارلىقتارىڭىزعا تاعى زور العىسىمدى ايتامىن. بارلىقتارىڭىزدى جاقسى كورەمىن»، - دەدى فەيسبۋكتەگى «قىزىقتى ستۋديا» توبىندا تاراعان ۆيدەجولداۋدا يليا يلين.

ەسكە سالا كەتسەك، قازاقستاندىق زىلتەمىرشى، الەمنىڭ ءتورت دۇركىن چەمپيونى يليا يلين بۇگىن 2018 -جىلعى قازاقستان چەمپيوناتىنىڭ جەڭىمپازى اتانعان بولاتىن. يلين 102 كەلىگە دەيىنگى سالماق دارەجەسىندە تالدىقورعاندا وتكەن ەل بىرىنشىلىگىن جەڭىپ الدى. يلين 172+208 كەلى زىلتەمىرلەردى جۇلقي كوتەرۋدەن الىشەر ورازبەك پەن ەلدار سەمبايەۆتى ارتقا تاستاپ، ەڭ جوعارى ناتيجە كورسەتتى.