دۇنيەجۇزىلىك كوشپەندىلەر ويىندارى: قازاق سپورتشىلارىنا قانداي جاعداي جاسالعان
ات سپورتى بويىنشا ونەر كورسەتەتىن سپورتشىلار بىرگە تۇرادى. ولار - اۋدارىسپاققا قاتىساتىن جىگىتتەر جانە كوكپارشىلار. قازاقپارات ءتىلشىسى ولاردىڭ تۇرمىس جاعدايىمەن تانىسىپ، كۇندەلىكتى اس ءمازىرىن ءبىلىپ قايتتى.
ات سپورتىنىڭ شەبەرلەرىن «كوگىلدىر ىستىق كول» دەگەن شيپاجايعا ورنالاستىردى. 3-كورپۋس كەڭەس زامانىنان قالعان نىسان بولسا دا، ءىشى تازا ءارى جارىق. ءاربىر بولمەنىڭ اۋدانى 6-7 شارشى مەتردەن اسپايدى. بولمەدە 2-3 كەرەۋەت، ۇستەل جانە كيىم ىلەتىن شكاف بار. شيپاجايدا قازاقستان قۇراماسىنىڭ قارسىلاستارى - قىرعىستان، وزبەكستان، اۋعانستان، التاي جانە تاعى باسقا سپورتشىلار دا جاتىر.
اۋدارىسپاقتان ءۇش دۇركىن ازيا چەمپيونى ءبىرجان قوساليەۆتىڭ ايتۋىنشا، شيپاجايدىڭ تاماعى جاقسى، ءبىراق ازداۋ بولىپ تۇر.
«ساناتوريدە سولاي عوي. تاماقتى كوپ بەرمەيدى. ەندى، بۇيىرعانى بولىپ جاتىر. اش ەمەسپىز (كۇلدى). ءبىراق تويمايمىز»، - ءبىرجان قوساليەۆ.
ءبىرجان قوساليەۆ اۋدارىسپاقتان +90 سالماق دارەجەسى بويىنشا ونەر كورسەتەدى. 2016 -جىلى وتكەن II دۇنيەجۇزىلىك كوشپەندىلەر ويىندارىندا ول التىننان القا تاققان بولاتىن. سول كەزدە ءبىز 90 كەلىگە دەيىن دە ءبىرىنشى ورىندى العان ەدىك. 70-تە دە التىن مەدال بۇيىرىپ تۇرعان. ءبىراق تورەشىلەر بەرمەدى. ول سالماقتا ەرنازار بايعونوۆ ونەر كورسەتەدى.
«قۇداي قالاسا، وسى جولى ءبىرىنشى ورىن الۋ كەرەك. ەلگە ابىرويمەن ورالامىز دەپ ۇمىتتەنەمىن. ءوزىم قازىر سالماق قۋىپ ءجۇرمىن. تاڭەرتەڭ تاماق ءىشىپ جۇرگەن جوقپىن. جاتتىعۋ جاسايمىن. تۇستە جەمىس-جيدەك جەيمىن. سالماقتى ءسال ازايتۋ قاجەت»، - دەيدى ە. بايعونوۆ.
وسى جولعى ويىنداردا اۋدارىسپاقتىڭ سالماق دارەجەلەرى بەسكە ارتىپ وتىر. اتاپ ايتقاندا، 60 كەلى - ازامات سەرعازين، 70 كەلى - ەرنازار بايعونوۆ، 80 كەلى - ارمان ساعىمبايەۆ، 90 كەلى - سىرىم ءىزباساروۆ جانە +90 كەلى - ءبىرجان قوساليەۆ. اۋدارىسپاق بويىنشا بارلىق جارىستار شولپان- اتانىڭ يپپودرومىندا وتەدى.
اعا جاتتىقتىرۋشى جانباتىر بەكمۇسايەۆتىڭ ايتۋىنشا، اۋدارىسپاقتىڭ اتتارى قازاقستاننان جەتكىزىلەدى.
«ءبىز تاڭعى ساعات 7.00-دە تۇرامىز. سوسىن جاتتىعۋ جاسايمىز. پالۋاندار جۇگىرىپ كەلەدى. سوسىن جۋىنادى دا، تاڭعى استارىن ىشەدى. 11:00-گە دەيىن دەمالىس. ودان كەيىن قايتادان جاتتىعۋعا كىرىسەمىز. قازىر اتتارىمىزدى كۇتىپ وتىرمىز. بۇگىن- ەرتەڭ اتپەن دايىندىقتى باستايمىز. نەگىزگى جارىستار 5-7 -قىركۇيەك كۇندەرى وتەدى»، - دەدى ج. بەكمۇسايەۆ قازاقپارات تىلشىسىنە بەرگەن سۇحباتىندا.
اۋدارىسپاقتىڭ اتتارى قازاقستاننان جەتكىزىلسە، كوكپار مەن جامبى اتۋدىڭ اتتارىن قىرعىزستان بەرەدى. قۇرامامەن بىرگە كەلگەن ماماندار اتتاردى قارايدى. سپورتشىلار دا اتتاردى تاڭداي الادى.
قازاقتىڭ سپورتشىلارى باسقا كورپۋستا ورنالاسقان اسحانادا تاماقتانادى. تۇسكى اسقا قيار، قىزىلشا مەن قىرىققابات ارالاس سالات، نان، سورپا مەن كوكونىس قوسىلعان ەت بەردى. دەسەرتكە - قاربىز بەن قاۋىن.
ايتا كەتەيىك، كەشە كەشقۇرىم شولپان- اتانىڭ يپپودرومىندا III دۇنيەجۇزىلىك كوشپەندىلەر ويىندارى رەسمي تۇردە اشىلدى.
سالتاناتتى شاراعا ق ر پرەزيدەنتى نۇرسۇلتان نازاربايەۆ تا قاتىستى.
