بۇگىن ەكى التىنىمىزدى تارتىپ الدى - مىرزاعالي ايتجانوۆ

استانا. قازاقپارات - بوكستان قازاقستان كومانداسى ازيا ويىندارىنىڭ تاريحىندا تۇڭعىش رەت التىنسىز قالدى.

بۇگىن فينالدا جۇدىرىقتاسقان ەكى بوكسشىمىز دا كۇمىستى قاناعات تۇتقان بولاتىن. وسى ورايدا، ۇلتتىق قۇرامانىڭ باس باپكەرى مىرزاعالي ايتجانوۆ Olympic.kz سايتىنا سۇحبات بەرىپ، جەڭىلىستىڭ سەبەبىن ءتۇسىندىردى.

«ازيا ويىندارىنا بەس جۇلدە الامىز دەپ كەلگەنبىز. وعان شامامىز دا جەتەتىن ەدى. الايدا، تىم تومەن ناتيجە كورسەتىپ وتىرمىز. ءار ەل ءوز سپورتشىسىن قورعايدى. سول سەبەپتى، ءبىر ەلدىڭ سوڭىنا ءتۇسىپ العانىمىز دۇرىس بولماس. جىگىتتەر بار كۇشىن سالدى، ولارعا ايتارىم جوق. كوپتەگەن كەدەرگىلەر مەن كەلەڭسىز جايتتار ورىن الىپ وتىر. فينالعا دەيىن ءۇش بوكسشىمىزدىڭ جولىن كەسكەن. ەندى، مىنە، ەكى جىگىتىمىزدىڭ التىنىن تارتىپ الدى. سابىر قىلعاننان باسقا امال جوق. جالپى، بىزگە شارشى الاڭداعى قارسىلاستارمەن عانا ەمەس، باسقالارمەن دە كۇرەسۋگە تۋرا كەلدى. قايرات ەراليەۆتى الىپ تاستاعاننان كەيىن-اق، قيىن سوعارىن سەزدىم. ءتىپتى، ازيا ويىندارىنا اتتانار كەزدە دە بۇل بەلگىلى بولعان. سەبەبى، ءبىزدىڭ ءبىر وكىلىمىز جوق. قازاقستاندىق تورەشىلەر دە الىنباعان. سوندىقتان، ازيا ويىندارىندا ساياسات جەڭدى. اسلانبەك شىمبەرگەنوۆكە جوق جەردەن ەسكەرتۋ بەرىپ، ۇپايىن الىپ تاستادى. بوكسشىعا ءۇش- ءتورت رەت اۋىزشا ەسكەرتۋ بەرىلگەن سوڭ عانا، ۇپايىن الىپ تاستاۋشى ەدى. بۇل جولى بىردەن... جىگىتتەرگە ايتار وكپەم جوق. بار كۇشىن سالدى»، - دەدى مىرزاعالي ايتجانوۆ.

ەسكە سالا كەتەيىك، بۇگىن ازيادا فينالىندا جۇدىرىقتاسقان اسلانبەك شىمبەرگەنوۆ (69 كەلى) پەن ءابىلحان امانقۇل (75 كەلى) تورەشىلەر شەشىمىمەن جەڭىلىس تاپتى.

كوپشىلىك ماماندار مەن جانكۇيەرلەر قازاق بوكسشىلارىنا قيانات جاسالعانىن ايتۋدا. ەكى بوكسشى دا فينالدا التىنعا لايىقتى ونەر كورسەتكەن بولاتىن.

 

فوتو: دانيار مايلىبايەۆ. قازاقستان ۇ و ك باسپا ءسوز قىزمەتى