پاۆلودارلىق وقۋشىلار قازاق ءتىلىن لاتىن قارپىمەن وقي باستادى
ءبىلىم ءبولىمىنىڭ باس مامانى نۇرگۇل ازانبايەۆانىڭ ايتۋىنشا، بۇل فاكۋلتاتيۆتىك كۋرس العاش رەت قازاق تىلىندە ءبىلىم بەرەتىن №1، №2، №7، №12، №19، №22، №25، №35، №37 مەكتەپتەرىندە ەنگىزىلگەن.
«سىنامالى جوبا ءبىلىم الۋشىلارعا الدىن الا لاتىن گرافيكاسىمەن تانىسۋعا مۇمكىندىك جاساپ، جاڭا الفاۆيتتىڭ ەنۋىنە وڭاي بەيىمدەلۋگە مۇمكىندىك بەرەدى»، - دەدى نۇرگۇل ازانبايەۆا.
باعدارلامانى «انا ءتىلى» ورتالىعىنىڭ ديرەكتورى شولپان كەنجيكوۆا جاساپ شىعارعان. ول فاكۋلتاتيۆتى جۇرگىزەتىن ۇستازدار ءۇشىن ارنايى سەمينار وتكىزدى.
«اتالعان مەكتەپتەر لاتىن تىلىندە جازىلعان وقۋ-ادىستەمەلىك قۇرالدارمەن جۇمىس جاساۋعا دايىن. فاكۋلتاتيۆ ءار مەكتەپتەن 20 بالانى وقىتۋعا ارنالعان. وقۋ جىلى بويى بەسىنشى سىنىپ وقۋشىلارى ءۇشىن اپاتاسىنا ءبىر رەت قوسىمشا ساباقتار وتەتىن بولادى. بالالار لاتىنشا وقىپ- جازۋدى، سوزدەردى تانۋدى ۇيرەنەدى»، - دەدى باس مامان.
ايتا كەتۋ كەرەك، سىناق جوبا 2020 -جىلى قازاق تىلىنەن لاتىن قارپىنە كوشۋگە دايىندىق ماقساتىندا ىسكە قوسىلدى.
