ۇكىمەت پەن مينيسترلىكتەر تۇركىستان وبلىسىنىڭ قالىپتاسۋىنا نازار اۋدارسىن - ن. نازاربايەۆ
بۇل تۋرالى بۇگىن ق ر پارلامەنتى پالاتالارىنىڭ بىرلەسكەن وتىرىسىندا مەملەكەت باسشىسى نۇرسۇلتان نازاربايەۆ ايتتى، دەپ حابارلايدى قازاقپارات ءتىلشىسى.
«وزدەرىڭىز دە بىلەتىندەي، وسى جىلدىڭ شىلدە ايىندا شىمكەنت قالاسىنا رەسپۋبليكالىق ماڭىزى بار قالا مارتەبەسى بەرىلىپ، جاڭا تۇركىستان وبلىسى قۇرىلدى. قاسيەتتى تۇركىستان قالاسىندا جاڭا وبلىس ورتالىعىنىڭ قۇرىلۋى دەربەس اكىمشىلىك ورتالىق رەتىندەگى ءوڭىردىڭ تاريحي ءمانىنىڭ قايتا ورلەۋىنىڭ بەلگىسى سانالادى. ۇكىمەت پەن مينيسترلىكتەر وبلىس ورتالىعىنىڭ قۇرىلىسىنا، قالىپتاسۋىنا لايىقتى نازار اۋدارۋلارى ءتيىس. قازاقستانداعى بيزنەس تە بۇل جۇمىستارعا ارالاسۋى قاجەت. مەن دە ول جاققا بارماقپىن، باسشىلارمەن بىرلەسىپ، ءمان- جايدى تالقىلايتىن بولامىز. تاياۋ ۋاقىتتا دامىعان جاڭا وبلىس ورتالىعى، ەكونوميكامىز بەن بيزنەسىمىزدىڭ جاڭا ءوسىم نۇكتەسى پايدا بولارىنا سەنىمدىمىن»، - دەپ اتاپ ءوتتى ەلباسى.
قازاقستان پرەزيدەنتى وبلىس ورتالىعىنىڭ تۇركىستانعا كوشىرىلۋى الەۋمەتتىك- ەكونوميكالىق تۇرعىدان عانا ەمەس رۋحاني جاعىنان دا اسا ماڭىزى بار ەكەنىن باسا ايتتى.
«ول ەلىمىزدىڭ ەڭ كيەلى جەرلەرىنىڭ ءبىرى. تارلان تاريحىمىزدا تالاي تاعدىرلى شەشىمدەر وسىندا قابىلدانعان. ەسىمدەرى ەل تاريحىندا ماڭگى جازىلعان ءبىرتۋار تۇلعالارىمىز وسىندا جاي تاپقان. حالىق تىعىز قونىستانعان تۇتاس وڭتۇستىكتىك ءوڭىردىڭ دامۋى جاڭا وبلىس ورتالىعىنىڭ جۇمىسىن ءتيىمدى ۇيىمداستىرۋعا بايلانىستى. سوندىقتان ۇكىمەت پەن اكىمشىلىك بۇل جەردە تىعىز جۇمىس ىستەۋى كەرەك. سونىمەن بىرگە رەسپۋبليكالىق ماڭىزى بار قالا مارتەبەسىن يەلەنگەن شىمكەنتتىڭ تىنىس- تىرشىلىگى دە نازاردا بولۋى ءتيىس»، - دەدى نۇرسۇلتان نازاربايەۆ.
ق ر پرەزيدەنتىنىڭ اتاپ وتۋىنشە، تاياۋ ۋاقىتتا پارلامەنت قاراۋىنا جاڭادان قۇرىلعان اكىمشىلىك- اۋماقتىق بىرلىكتىڭ تولىققاندى جۇمىسىن قامتاماسىز ەتۋگە باعىتتالعان زاڭ جوباسى ەنگىزىلەتىن بولادى.
