استانا الەم اقىندارىنىڭ كوزىمەن
شىعارماشىلىق كەشكە تانىمال وتاندىق اقىندارمەن قاتار شەتەلدىكتەر دە قاتىستى. اتاپ ايتقاندا، فينليانديالىق اقىن، سلاۆيان، ورىس ادەبيەتىنىڭ اۋدارماشىسى يۋككا ماللينەن، اقىن، شانحاي ۋنيۆەرسيتەتىنىڭ پروفەسسورى وۋيانگ يۋ، فرانتسۋز جازۋشىسى، پۋبليتسيست جانە اۋدارماشى، پروزاشى تەرري مارينياك، اقىن، باسپاگەر، سۋرەتشى مالگوجاتا ماحليەۆسكايا، اقىن، باسپاگەر گاگيك داۆتيان، اقىن ليۋبوۆ كراساۆينا، اقىن، پروزاشى، سىنشى، «ليتەراتۋرنايا گازەتا» باسىلىمىنىڭ باس رەداكتورى ماكسيم زامشيەۆ، اقىن سەرگەي مناتساكانيان جانە اقىن، اۋدارماشى ميحايل سينەلنيكوۆ قاتىستى.
پوەزيا كەشىنە قاتىسۋدىڭ نەگىزگى شارتىنا سايكەس اقىندار استانا، قازاقستان نەمەسە ەلباسى تۋرالى قازاق، ورىس، اعىلشىن تىلدەرىنە اۋدارىلعان، سونداي- اق بۇۇ بەكىتكەن رەسمي تىلدەردە شىعارىلعان اۆتورلىق ولەڭ جولدارىن وقىدى.
«بۇگىن قازاق ادەبيەتى ءۇشىن ايتۋلى كۇن. استانا قالاسىنىڭ 20 جىلدىق مەرەيتويىنا وراي الەم اقىندارىنىڭ قاتىسۋىمەن حالىقارالىق پوەزيا كەشى ءوز جۇمىسىن باستادى. ايتۋلى ءىس- شاراعا الىس تا جاقىن ەلدەردەن كەلگەن اقىندار جانە وتاندىق ادەبيەت الەمىنىڭ مايتالماندارى، بۇگىنگىنىڭ اقيىق اقىندارى استاناعا ولەڭ ارناپ، قازاق ەلى جايلى قالام تەربەپ جاتىر» ، - دەدى ق ر مادەنيەت جانە سپورت ءمينيسترى ارىستانبەك مۇحامەدي ۇلى.
ءىس- شارا بارىسىندا سونىمەن قاتار، «الەم اقىندارى قازاقستاندى جىرلايدى» اتتى شىعارمالار جيناعىنىڭ تۇساۋى كەسىلدى. اتالعان جيناقتا قالانىڭ تاريحى، ونىڭ ەرەكشە مادەني قۇندىلىقتارى تۋرالى شىعارمالار جاريالانعان.
