انگەلا مەركەل افريكاعا اتتاندى

استانا. قازاقپارات -  گەرمانيا كانسلەرى انگەلا مەركەل افريكا ەلدەرىنە ءۇش كۇندىك ساپارمەن باردى. ول سەنەگال، گانا جانە نيگەريا مەملەكەتتەرىنە ات باسىن تىرەمەك.

 مەركەل بۇل ەلدەردىڭ باسشىلارىمەن زاڭسىز كوشى- قون ماسەلەسىن تالقىلاماق. ايتۋىنشا، داعدارىستى شەشۋدىڭ بىردەن ءبىر جولى تۇراقتى ەكونوميكا. ءىرى نەمىس ينۆەستورلارى مەركەلمەن بىرگە كەلدى. ويتكەنى گەرمانيا كانسلەرى افريكامەن كەلىسىم دەپ اتالاتىن ۇلكەن 20-لىقتىڭ باستاماسىن ىسكە اسىرماق ويدا.

 ايتا كەتكەن ءجون، بۇل باعدارلاما جەكە ينۆەستيتسيالارعا قولايلى جاعداي جاساۋعا ارنالعان.

 انگەلا مەركەل، گەرمانيا كانسلەرى:

 - سەنەگال تاۋەلسىزدىككە قول جەتكىزگەننەن بەرى، ءبىز بۇل مەملەكەتپەن تىعىز سەرىكتەستىك ورناتتىق. ەندى جەكە ينۆەستيتسيانى دامىتۋ ءۇشىن بىرلەسە جۇمىس اتقارۋىمىز كەرەك. سەنەگال جاس مەملەكەت، جىل سايىن ەڭبەك نارىعى 300 مىڭ اداممەن تولىسىپ وتىر. ءبىزدىڭ ماقسات - ولاردىڭ ەلدەن قونىس اۋدارۋىن بولدىرماي، جۇمىسپەن قامتاماسىز ەتۋ.

www.24.kz