قازاقستاندىق قۇلتەمىرلەر ۆەتنامدا دوپ وينادى
قازاقستاندىق ستۋدەنتتەر ارەناعا شىعۋعا دايىن. اليۋمينيي قاڭقادان، ەلەكتروقوزعالتقىشتان، ميكروجۇيەدەن جانە پلاستيكالىق شولمەكتەردەن قۇراستىرىلعان مەحانيزمنىڭ قۇنى 10 مىڭ دوللار جانە 2 جارىم اي ۋاقىت. وسىنداي ەكى مەحانيزم بايقاۋ ۇيىمداستىرۋشىلارى قويعان تاپسىرمالاردى ورىنداۋى كەرەك.
شارت ءداستۇرلى ۆەتنام ويىنىنا نەگىزدەلگەن. ويىن ەرەجەسىنە سايكەس، قۇلتەمىر قارسىلاس روبوتقا دوپ جەتكىزۋى ءتيىس. ەكىنشىسى دوپتى شىعىرشىققا ءتۇسىرۋى قاجەت. بۇل ادامدارعا وڭايعا سوقپاعانىمەن، روبوتتار ءۇشىن كۇندەلىكتى جاتتىعۋ ىسپەتتى. ال قازاقستان تۋى «ABU Robocon 2018» قاتىسۋشىلارىنا بۇرىننان بەلگىلى. ويتكەنى ەلىمىز ورتالىق ازيادان بايقاۋعا قاتىسىپ جۇرگەن جالعىز مەملەكەت.
بايراقتى باسەكەگە ازيا- تىنىق مۇحيتى حابار تاراتۋ وداعىنا مۇشە ەلدەردىڭ تەحنيكالىق جوعارعى وقۋ ورىندارىنىڭ ستۋدەنتتەرى عانا قاتىسا الادى. ال «حابار» اگەنتتىگىنىڭ اتالعان وداققا مۇشە بولعانىنا بيىل 20 جىل تولىپ وتىر.
دجاۆاد موتتاگي، ازيا- تىنىق مۇحيتى حابار تاراتۋ وداعىنىڭ باس حاتشىسى:
- مەن روبوكون بولاشاعىنا ۇلكەن سەنىممەن قارايمىن. 17 جىلدىق تاريحى بار ويىنداعى باسەكە جىل سايىن كۇشەيىپ كەلەدى. بايقاعانىڭىزداي قاتىسۋشىلار مەن جانكۇيەرلەر بۇل شارانى قولدايدى. ويتكەنى تەك جاستار عانا كەمەل كەلەشەك ءۇشىن جاڭا تەحنولوگيالاردى يگەرۋدى جالعاستىرماق.
- 2012 -جىلدان بەرى بايقاۋدا ەلىمىزدىڭ نامىسىن حالىقارالىق اقپاراتتىق تەحنولوگيالار ينستيتۋتى قورعاپ كەلەدى. كوماندا جەتەكشىسى نۇرلان كارىمجاننىڭ ءوزى ءبىر كەزدەرى روبوكون ويىندارىنا قاتىسقان. ا ق ش- تاعى ماگيستراتۋرادا وقۋىن ءتامامداعان سوڭ ەلگە ورالىپ، ءوزى وقىعان جوعارى وقۋ ورنىنا وقىتۋشى بولىپ جۇمىسقا تۇردى. بۇگىندە مىنە كونسترۋكتورلار كومانداسىن باسقارادى. وسىنداي جارىستى قازاقستاندا وتكىزۋ نۇرلاننىڭ ەندىگى ارمانى.
نۇرلان كارىمجان، حالىقارالىق اقپاراتتىق تەحنولوگيالار ينستيتۋتى زەرتحاناسىنىڭ مەڭگەرۋشىسى:
- روبوكون ويىندارىندا ەكونوميكاسى وزىق ەلدەردىڭ قاتىسۋشىلارى فاۆوريتتەر قاتارىنان ءجيى كورىنىپ جاتادى. ماسەلەن، قىتايدان 200 كوماندا بار. ولاردىڭ ءوزارا باسەكەلەستىگىنىڭ قانشالىقتى جوعارى ەكەنىن وسىدان- اق بايقاۋعا بولادى. ءۇندىستاندا دا وسى جاعداي. جۋىردا مىسىرلىق قۇراما مۇشەلەرىمەن اڭگىمەلەستىك. ولاردىڭ ايتۋىنشا، ءبىر ۋنيۆەرسيتەت قابىرعاسىندا جەتى كوماندا ەل نامىسىن قورعاۋ ءۇشىن ءوزارا سايىسىپ جاتىر.
ماردون ءتاجىحانوۆ، حالىقارالىق اقپاراتتىق تەحنولوگيالار ينستيتۋتىنىڭ 4-كۋرس ستۋدەنتى:
- جوعارعى وقۋ ورنى باسشىلىعى ءبىزدى قولداپ، بۇگىندە يدەيالارىمىزدى جۇزەگە اسىرۋ مۇمكىندىگىنە يە بولىپ وتىرمىز. وزگە ەلدەردىڭ دە كونسترۋكتورلارىمەن تانىسىپ، ءوزارا تاجىريبە الماسۋعا بولادى. ويىن قورىتىندىسى بويىنشا الاڭ يەلەرى جەڭىمپاز اتاندى.
قازاقستاندىقتار قىتاي مەن ءۇندىستان وكىلدەرىن باسىپ وزباسا دا، بايقاۋدان ۇلكەن تاجىريبە الدى. ەندى كەلەسى دودا 2019 -جىلى موڭعوليادا وتەدى دەپ جوسپارلانىپ وتىر.
www.24.kz
